› 選擇地區
三藩市
紐約
洛杉磯
其他美國地區
香港 台灣 北美
 
2016年11月09日

體壇拾趣:
梅禮祖高域爭做年終一哥

ATP年終賽將會喺今個月13號正式開打,而賽會就喺周一舉行抽籤儀式,新任一哥梅禮同力爭衞冕嘅祖高域分別領銜「麥根萊組」同「蘭度組」,繼續爭年終一哥嘅寶座!

拿度放風下月復出

英國球手梅禮周一正式「升呢」做一哥,佢就話自己想快啲喺倫敦嘅O2球場打年終賽:「全球最勁嘅八位球手都會喺年終賽現身,我相信每一場比賽都係硬仗,但我好期待同佢哋交手。」至於同梅禮一樣身處麥根萊組嘅,就有瑞士球手華域加、日本嘅錦織圭、同埋克羅地亞球手施歷。
至於祖高域就喺蘭度組,同加拿大重炮華奧歷、法國球手蒙菲斯、奧地利新星迪安爭出線;由於祖高域目前喺積分榜攞到10,780分,只落後梅禮405分,所以呢位塞爾維亞球手就梗係要喺年終賽力爭衞冕,希望可以連續三年成為年終一哥啦。
值得留意嘅係,蒙菲斯同迪安都係喺職業生涯中首次打入年終賽;而現年23歲嘅迪安更因為世界排名第八嘅西班牙球手拿度因傷退賽,所以佢先攞到年終賽嘅入場券咋。另外,拿度近日就喺twitter向粉絲宣佈好消息,佢話自己喺下個月就會正式復出,參加阿布扎比網球錦標賽。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載