› 選擇地區
三藩市
紐約
洛杉磯
其他美國地區
香港 台灣 北美
 
2016年11月15日

求驗客手記:踢到火起除人褲
迪斯高小學雞

早前有報道話,有班日本人搞緊個「玩閹」大賽,仲有晒規則,唔知十幾年後奧運會唔會將玩閹列入比賽項目呢。其實國際球星都會做吓小學雞嘢,就好似波斯尼亞前鋒迪斯高咁。周日世界盃外圍賽作客希臘,迪斯高就因為不滿對手經常侵犯佢,嬲嬲地就除咗對手柏柏斯達夫普路斯條褲,球證隨即兩黃一紅趕迪斯高出場。

下半場除人褲被逐

希臘主場對波斯尼亞嘅H組之戰,火藥味就認真大,全場出現12黃兩紅。上半場波軍由祖雲達斯中場比真歷主射罰球,雖然中柱彈出,但就反彈主隊門將卡里捷斯入網,客軍領先1:0。希臘失守後越踢越躁,波軍前鋒迪斯高就梗係成為希臘後衞圍攻嘅目標。
球迷最期待嘅畫面終於喺79分鐘出現,迪斯高俾柏柏斯達夫普路斯撞低,呢位多蒙特後衞借啲意跨過迪斯高執波,膝部就撞到迪斯高個頭,跌喺地仲未起身嘅迪斯高就梗係反擊,順勢一拉就除咗柏柏斯達夫普路斯條波褲,咪睇柏柏仔一副硬漢外型,都着純白底底,真係夠晒pure。
事件引起雙方一輪衝突,迪斯高同柏柏斯達夫普路斯各領黃牌,但因為迪斯高12分鐘已經領咗第一張黃牌,結果兩黃一紅被逐,而希臘另一位後衞柏柏杜普路斯就因為衝撞球證,亦都紅牌被逐。

波國臨尾香失兩分

喺10打10嘅情況下,希臘喺補時五分鐘由後衞薩維拉斯禁區頂勁射入網,追成1:1平手,保持分組四戰不敗,領先波斯尼亞三分排第二。波斯尼亞失兩分,迪斯高下輪仲要停賽,好彩佢地之後主場對「魚腩」直布羅陀箒。不過呢位前曼城前鋒仲好不滿咁話:「我都唔知點解要趕我出場,係對手挑釁我在先!球證判決認真唔公平,講真我哋值得贏3:0。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載