› 選擇地區
三藩市
紐約
洛杉磯
其他美國地區
香港 台灣 北美
 
2016年11月24日

咖喱牛腩:BBQ效應 - 牽牛

上星期六大台台慶,據報收視錄得歷史新低,藝員們「粉身碎骨」表演都幫唔到手,最衰係外國勢力介入,英超竟然別有用心安排曼聯對阿仙奴呢場大戰,連小弟呢啲小男人,都竟然可以擊敗老婆大人,搶到電視遙控器欣賞到仙魔大戰。
網民成日恥笑大台劇集千篇一律,劇集大結局成日BBQ,嗱,你唔好矮化BBQ,車路士今季突飛猛進排榜首,都係靠BBQ咋。話說干地(圖)今夏去車路士報到,第一件事就係搞個大型BBQ,仲有埋吹氣城堡,等球員帶埋老婆仔女一齊玩。干地對球員嘅飲食習慣好嚴格,包括禁食番茄醬,不過呢次BBQ就打破禁令,球員食乜飲乜都可以。據報摩連奴執教後期,好多車仔球員都對球會心死,暫代領隊軒迪克上季中接手努力修補關係,成效唔大,干地嚟到,就令到球員一條心重振藍戰士威勢。
干地接手車仔初期,小弟原本都唔太睇好,帶祖雲達斯拎冠軍,只因意甲競爭唔大;帶意大利殺入歐國盃八強,互射12碼先輸畀德國,以為班老將咬住啖氣箒;不過以呢期車仔聯賽六連勝兼不失嘅走勢,真係服咗干地。好似域陀摩西斯呢個英超浪人,踢右翼衞踢到識飛,仲有迪亞高哥斯達,今季入球多之餘,仲識收火。不過車仔呢期一片向好,都要小心法比加斯,喺干地3-4-3體系,佢基本上冇得踢,近期下放去踢預備組,上季逼走摩連奴,盛傳法比仔係鬼,如果佢搞搞震,車仔呢一陣子和諧又維持幾耐呢?
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載