› 選擇地區
三藩市
紐約
洛杉磯
其他美國地區
香港 台灣 北美
 
2016年12月15日

求驗客手記:上港話5.1億買奧斯卡
中超豪到嚇死人

中超近一、兩年已經成為球壇最大銷金窩,豪門球會已經唔滿足去二、三線聯賽買人,人仔彈藥逐漸瞄準歐洲頂級球會。據報上季中超季軍上海上港已經同目前英超榜首車路士傾掂數,將會以破中超轉會費紀錄6,200萬歐元(約5.1億港元),收購巴西中場奧斯卡杜斯山度士,新一輪中超球會鬥破轉會費紀錄,睇嚟好快又會展開。
仲記得年初有段時間,中超轉會費紀錄輪住破。江蘇蘇寧由車路士收購拉美利斯,之後到廣州恒大出手用4,200萬歐元羅致積臣馬天尼斯;江蘇又不甘示弱用到5,000萬歐元買阿歷士泰斯拿;最終最高紀錄由上海上港所創,豪使5,500萬歐元收購「變形俠醫」侯克。上港喺上季中超只係得第三,球會方面梗唔滿意,先同主帥艾歷臣分手,請咗前車路士主帥波亞斯接手;下一步就梗係着手增兵,頭號目標就睇中奧斯卡。
車路士今季由干地領軍下排緊榜首,但奧斯卡就冇乜功勞,因為佢自九月中開始一直冇喺聯賽正選上陣。雖然波亞斯教過車路士,但奧斯卡喺2012年以1,900萬鎊加盟車仔之前,波亞斯已經被球會炒咗,如果交易落實,就會係佢哋首次合作。據講車路士樂於放奧斯卡走,收返五千幾萬鎊喺一月增兵,預計交易會喺下月正式落實。奧斯卡受訪時亦確認,呢單交易已經90%完成。

傳搶埋馬高斯盧祖

25歲嘅奧斯卡去到上港應該不愁寂寞,目前陣中除咗侯克,仲有另一巴西前鋒艾傑臣,而10號仔孔卡喺上季受重創,下季仲要養傷一段時間,波亞斯希望奧斯卡可以代替佢。另外,亦有傳上港下一目標係曼聯嘅守將馬高斯盧祖。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載