› 選擇地區
三藩市
紐約
洛杉磯
其他美國地區
香港 台灣 北美
 
2016年12月17日

求驗客手記:
賀四奪金球獎
艾琳娜胸繪C朗

艾琳娜用個胸畫基斯坦奴朗拿度(C朗)出嚟?佢哋唔係分咗手咩?乜個胸可以用嚟畫畫嘅咩?媽,我好亂呀!睇真啲,原來此艾琳娜不同彼艾琳娜。呢個艾琳娜(Irina Romanovskaya)雖然都係俄羅斯人,同C朗嗰位名模前女友同名,但佢係一個擅長用胸去畫畫嘅藝術家。

曾用胸畫普京聲名大噪

C朗禮拜一獲得今年度金球獎,所以藝術家艾琳娜就決定用自己嘅拿手好戲,用個胸幫C朗畫張畫,賀一賀佢。睇番片,唔使露點,艾琳娜着住件低胸衫,先將顏料塗上個胸度,再將胸上面嘅顏料印上畫紙;有時要修飾啲細位,佢就會用手指上色。佢話:「用個胸去畫嘅時間就要耐啲,我最初嘗試嗰陣,會先用鉛筆起草稿,咁會易啲,但當我畫得多,技術越來越好,開始覺得鉛筆冇乜作用。」艾琳娜唔係第一次見報㗎嘞,佢舊年就試過用個胸去畫俄羅斯總統普京。
C朗家陣就喺日本,同皇家馬德里一齊備戰聽日舉行嘅世冠盃決賽。皇馬禮拜四喺準決賽以2:0踢咗CF阿美利加出局,C朗賽前又被人影到佢喺大合照嗰陣趷高腳企。其實幾乎每次大合照,C朗都好似細路咁,想做入面最高嗰個。

世冠盃睇片執法惹爭議

賽後最多人講嘅係睇片執法嘅問題。C朗喺93分鐘嘅入波有越位嫌疑,要場邊裁判睇慢鏡決定。嗰陣我求大俠睇住直播,都唔知發生咩事,以為球證吹哨子完場㖭,而兩隊球員亦好迷茫。過咗一陣,先知原來裁判睇完片確認C朗冇越位,入球有效。被選為今場最佳球員、贏咗架車嘅莫迪歷就唔太滿意呢套睇片協助執法嘅系統,「呢個係新嘗試,但我就唔太鍾意,佢令足球比賽多咗爭議,令人困惑,我希望國際足協中止呢項新嘗試。」至於皇馬教練施丹話睇片執法引起混亂,希望國際足協可以再改善吓。我求大俠認為睇慢鏡協助球證執法係一項好嘗試,但有好多地方可以做得更好,例如加強場邊裁判睇片決定嘅速度,同埋要講畀現場同埋電視觀眾知道發生咩事。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載