› 選擇地區
三藩市
紐約
洛杉磯
其他美國地區
香港 台灣 北美
 
2017年01月16日

求驗客手記:
入晒西甲19隊
巴塞出盡法寶留美斯

基斯坦奴朗拿度(C朗)上周拎埋國際足協世界足球先生獎,當然威到盡,佢嘅宿敵、巴塞隆拿前鋒美斯又點會甘心,上周六西甲,就領球隊贈拉斯彭馬斯五蛋,美斯亦攻入拉軍大門,終於對今季19支對手都有入波,儲齊一套!見美斯fit到咁,巴塞亦都加緊同佢嘅續約談判。

追平魯爾紀錄

巴塞新一年經過頭兩場不勝終於回勇,上周中西盃擊敗畢爾包晉級,昨主場對拉斯彭馬斯當然冇留力,畢竟拉軍過去只屬升降機,同巴塞交手機會唔多,所以連美斯都仲未入過佢哋波,好彩呢場美斯終於如願,下半場52分鐘門前執雞,加上蘇亞雷斯上下半場各建一功,阿達杜倫同阿歷斯維度亦有入球,以5:0大勝,取得兩連勝。
美斯亦把握到刷數據機會,對拉軍入波後,已經射破今季19支對手大門,西甲殺手當之無愧,而且佢亦都累積攻破35支西甲球隊,平咗皇馬前鋒魯爾嘅紀錄。問世間要搵另一個頂級前鋒嚟取代美斯,真係難過搵條恐龍;巴塞亦都盡晒力希望留住美斯,主席巴杜美話:「好多傳媒報道我哋同美斯續約遇上挫折,我想講呢啲都唔係真,我哋同美斯家人一直保持良好溝通,美斯留喺巴塞嘅意願好明顯,大家唔使擔心。」巴杜美口講淡定箒,不過今時今日巴塞除咗面對曼城、曼聯呢啲球隊競爭,仲要面對中超嘅無限銀彈,年薪隨時可以開到億億聲歐元計。

打友情牌 撤高層職

唔講錢都要講心,好似巴塞已經開動老友機制,蘇亞雷斯、恩尼斯達等已經表晒態希望美斯續約,而且為咗𠱁呢位阿根廷球王,連球會高層都冇面畀。
話說巴塞體育關係主任加達高斯,之前就話美斯如果冇恩尼斯達、尼馬呢啲球員協助,唔會有咁出色成就,講真足球係團體運動,加達高斯呢番說話都真係冇錯,不過唔知係唔係美斯聽完呢番說話嬲嬲,巴塞竟然撤去加達高斯嘅公關工作,剩係留住佢青訓職務,呢個又算唔算關公災難呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載