› 選擇地區
三藩市
紐約
洛杉磯
其他美國地區
香港 台灣 北美
 
2017年01月19日

求驗客手記:爆冷溫床
鉸剪射手碎落「葉」

講波佬成日話,英格蘭足總盃係爆冷溫床;周二第三圈重賽,兩支非聯賽球隊林肯城同瑟頓聯,都爆冷淘汰高組別球隊晉級,其中林肯城憑正職係揸開鉸剪嘅髮型師尼敦阿諾特奠勝,以1:0淘汰英冠球隊葉士域治,開出3.35倍主W。

業餘隊連環爆冷

球迷或者對林肯城好陌生,其實呢隊波都威風過,75/76球季英格蘭第四級別聯賽以破紀錄積分贏得冠軍,當時功臣就有格拉咸泰萊,呢位前英格蘭領隊早前過身,今仗全場9,000名觀眾喺76分鐘亮起手機閃燈,向呢位名帥告別。唔知係咪有泰萊保佑,到補時階段,奇蹟出現喺林肯城身上,中場尼敦阿諾特建功,以1:0氣走葉士域治,成功晉身第四圈。
踢非聯賽球隊,人工當然唔好,一般球員都要搵外快幫補生計,尼敦阿諾特本身兼任髮型師,仲會提供手機電召上門理髮服務,𠵱家咁紅,應該有好多人搵佢剪頭髮嘞。雖然林肯城過到呢關,不過下一圈主場對英冠次席白禮頓,呢一關就更加難過。
同日另一支爆冷晉級嘅非聯賽球隊瑟頓聯,作客英甲嘅AFC溫布頓,雖然先失一球,不過主隊有後衞羅便臣拎紅牌,瑟頓聯多打一人之下,由迪亞干追平,補時階段更有比亞姆同費捷迪各建一功,以3:1反勝,爆6倍冷W。瑟頓聯晉級後主場對英冠第三位嘅列斯聯,一樣難啃。另外,水晶宮主場2:1擊敗保頓,領隊艾拿迪斯拎到上任後首勝,下一圈就要硬撼曼城。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載