› 選擇地區
三藩市
紐約
洛杉磯
其他美國地區
香港 台灣 北美
 
2017年01月20日

求驗客手記:四日輸兩場追平上年
艦隊轉勢向下沉

也許輸開有條路,皇家馬德里喺周三西盃八強首回合主場以1:2不敵切爾達,錄得兩連敗,估唔到今年用咗一個月都唔夠,就追平咗舊年全年嘅輸波場數。有傳媒翻查紀錄,原來皇馬首回合先喺主場輸波,都好難喺次回合作客翻身,唔通今屆爭西盃冠軍已經凍過水?

出埋C朗都輸畀切爾達

皇馬星期日喺聯賽作客輸咗畀西維爾1:2,40場不敗告終,都唔算太令人意外。嚟到星期三嘅西盃,皇馬返到巴拿比奴主場,對手亦只係中游嘅切爾達,加上皇馬認真對待,派埋基斯坦奴朗拿度(C朗)擔正。點知又輸多場。喺64分鐘,切爾達由今季大勇嘅伊亞高艾斯巴斯先開紀錄,皇馬靠馬些路喺69分鐘追平。不過,切爾達嘅莊尼卡斯度喺一分鐘後建功,幫客軍領先2:1。皇馬之後換埋賓施馬入嚟,但呢位法國前鋒喺83分鐘面對空門炒高,最終「銀河艦隊」追唔番,繼續下沉,以1:2輸波。
只計正式比賽,皇馬舊年加埋輸得兩場,但今年一月都未過,就已經兩連敗。外國傳媒仲好精準計到,今次皇馬四日輸兩場,而兩連敗前,皇馬用咗397日先輸到兩場。

首回合輸波冇次追得番

皇馬由無堅不摧嘅艦隊變成沉船,教練施丹都有啲呆滯,「我哋踢咗場奇怪嘅比賽,我都冇得死撐,連輸兩仗,一定有啲嘢發生咗,呢個係我哋嘅低谷。我哋家陣要分析下滑嘅原因,搵出解決辦法。」有內地傳媒發現,皇馬呢屆西盃之旅睇怕九死一生,因為皇馬喺西盃史上首回合輸1:2之下,從未試過反勝晉級。計晒所有兩回合制嘅盃賽,皇馬自1997年以來八次喺首回合主場輸波,冇一次可以反勝。皇馬嚟緊周末喺聯賽主場對馬拉加,下周三就會作客切爾達踢次回合。另外,皇馬右閘丹尼爾卡華積因為腿筋受傷,預計要唞一個月,未知趕唔趕得切踢下個月對拿玻里嘅歐聯16強首回合。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載