› 選擇地區
三藩市
紐約
洛杉磯
其他美國地區
香港 台灣 北美
 
2017年02月17日

體壇拾趣︰
寶查娘娘派糧兼找數

加拿大網球美少女寶查不時都會喺社交網站「派糧」,上載啲性感自拍相畀班粉絲同觀音兵睇,而佢今年就第一次影美國《體育畫報》嘅泳裝特集,大擺誘人甫士,真係睇到啲兵仔流晒鼻血。除咗寶查之外,網壇「細威」莎蓮娜、禾絲妮雅琪,同埋喺上年里奧為美國贏得體操女子團體金牌嘅拉絲曼、比妮絲都有喺今年泳裝特集亮相。
不過,寶查呢位娘娘都唔係淨掛住收兵而零付出㗎,佢早前就講明會履行喺twitter嘅超級碗賭約,同一位力撐新英倫愛國者反勝亞特蘭大獵鷹嘅粉絲約會。寶查周三喺twitter話:「同《體育畫報》泳裝特集過咗忙碌嘅一日,然後夜晚……我就去約會嘞!」結果寶查真係找數,同呢位叫阿John嘅粉絲,一齊去睇網隊主場對公鹿嘅NBA常規賽,寶查仲將兩個人頭碰頭嘅自拍相放上twitter㖭,肯定羨慕死佢班粉絲啦。
至於網隊都好為班球迷着想,喺中場休息嗰陣邀請着住小背心嘅寶查出場,同阿John出去掟啲tee上觀眾席,等班球迷有機會收到娘娘親手派嘅紀念品。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載