› 選擇地區
三藩市
紐約
洛杉磯
其他美國地區
香港 台灣 北美
 
2017年02月17日

求驗客手記:16強又遭拜仁血洗
槍手無限Loop

禮拜三歐聯,阿仙奴作客被拜仁慕尼黑大炒5:1。講真,阿仙奴輸波,唔令人意外,佢哋連續六年都跟足劇本走,喺歐聯16強首回合輸波,仲至少輸兩球差距。呢次輸到四球差距,雖然多咗啲,但符合「阿仙奴常數」,睇嚟冥冥中自有主宰。睇番近幾屆歐聯16強次回合,兵工廠都有光榮出局嘅傳統,我求大俠建議,次回合博一博佢哋主場贏3:0!

相關新聞:求驗客手記:雲格賴死:季尾定去留

山神12碼追平現假希望

周三喺安聯球場舉行嘅首回合,兵工廠11分鐘就失守。拜仁翼鋒洛賓最鍾意推大位左腳遠射,但阿仙奴班球員冇做功課,奧斯爾仲企喺隔籬齋睇,結果俾洛賓喺「Robben zone」起到腳射入。阿仙奴喺上半場都仲頂得吓,30分鐘博到個12碼,阿歷斯山齊士雖然射失,但補射入網,半場追平1:1。睇落個勢阿仙奴真係可以破宿命?少年你太年輕嘞!阿仙奴就好似一個專業演員,下半場跟番劇本做。

梅拿埋齋拜仁大炒5:1

換邊後阿仙奴諗住搶攻,但中堅哥斯尼49分鐘就因傷退下火線,結果係攻不銳又守不穩。53分鐘,羅拔利雲度夫斯基接應拿姆傳中頂入;56分鐘,堤亞高艾簡達拿射成3:1。63分鐘,呢位西班牙中場遠射得手,射入今場個人第二球;喺10分鐘內,阿仙奴連失三球,輸到1:4。完場前,後備入替嘅湯馬士梅拿幫拜仁埋齋,兵工廠最終以1:5輸波。當見到拜仁入到第五球嗰陣,阿仙奴嘅山齊士絕望咁踎咗喺度,唔通呢隊阿仙奴真係配唔起山神份鬥心?
噚日嘅求驗客手記,我求大俠都提過,歐聯淘汰賽歷史上冇一支球隊可以喺首回合輸四球之下出線。雖然阿仙奴有個作客入球,但下個月次回合返到主場要入到拜仁四球兼唔失波,真係有啲難度。據博彩公司skyBET,阿仙奴嘅晉級賠率冷到21倍,但我求大俠覺得不妨吼吓阿仙奴贏3:0嘅波膽,有成34倍。
點解咁有心水?因為阿仙奴向來有首回合慘敗但次回合光榮出局嘅傳統,例如11/12球季,首回合對AC米蘭輸0:4而次回合就贏番3:0出局;而喺12/13同14/15球季,佢哋次回合都贏波,最後輸作客入球。跟番呢個劇本,阿仙奴次回合肯定會入到3:0,但之後攻極都唔入,創造奇蹟失敗,力戰出局。

相關新聞:如果我是阿仙奴躉…

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載