› 選擇地區
三藩市
紐約
洛杉磯
其他美國地區
香港 台灣 北美
 
2017年02月17日

求驗客手記:
雲格賴死:季尾定去留

呢場阿仙奴慘敗,賽後領隊雲格(圖)話下半場好似噩夢咁,全隊散晒。賽後全民圍插雲格;名宿基昂話係恥辱;至於廠迷唔單止爆粗鬧雲格,仲紛紛將次回合啲飛放出嚟,可能輸到冇眼睇!不過,雲格就話季尾先會諗去留問題。
睇住阿仙奴輸1:5,雲格心情都好差:「我哋冇晒組織,好似一盆散沙咁,喺比賽最後25分鐘,簡直係噩夢一樣。」當哥斯尼一被換走,球隊就係咁失波,雲格話:「我哋喺下半場一開始就失去哥斯尼,突然我哋就散晒,喺意志上崩潰,但我一定要講,我嘅對手比我哋踢得好。」

相關新聞:如果我是阿仙奴躉…

歐聯出局專心爭前四

首回合咁輸法,睇嚟阿仙奴都可以專心喺聯賽爭前四,同埋踢好嚟緊對瑟頓聯場英足盃,繼續往年嘅劇本。名宿基昂話:「我為雲格感到羞恥。教咗20年嘞,雲格係時候諗吓佢嘅前途,因為實在太醜嘞!」賽後球迷喺訪問中喪鬧雲格,另外原本阿仙奴對拜仁嘅次回合係冇晒飛,但首回合過後,有唔少球迷放番飛出嚟。又係嘅,萬一劇本唔係光榮出局,變咗做主場「飲七喜」嘅話,咁就盞自己受罪。至於雲格下季仲教唔教,英媒話阿仙奴已經開咗新約畀佢,但佢要到季尾先決定簽唔簽。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載