› 選擇地區
三藩市
紐約
洛杉磯
其他美國地區
香港 台灣 北美
 
2017年03月16日

咖喱牛腩:尼馬當立 - 咖喱

呢幾年睇巴塞隆拿,都覺得美斯係前線大佬,蘇亞雷斯係負責打頭陣嘅打手,尼馬(圖)就係跟尾嘅細佬。不過,就喺上星期嗰場經典嘅歐聯反勝後,覺得尼馬呢位太子已經夠實力去繼承,甚至搶走美斯嘅王位。
上星期場歐聯美斯喺中路略顯平淡,而尼馬就喺左路一己之力帶住巴塞去攻,尤其尾段嗰三球,全部都關尼馬事。嗰陣尼馬所顯露出嘅唔單止係球技,仲有一個人帶起球隊嘅鬥志同領導力,喺技術同心理質素上,都夠晒班做一支頂級球隊,甚至可以話巴塞嘅大佬。喺歐聯後嘅聯賽,尼馬冇出到,巴塞就瀨嘢,竟然輸畀拉科魯尼亞。
喺數據上,美斯嘅入球同助攻都仲領先緊尼馬,但再睇細啲,就發現美斯更多負責最後一腳傳波或者埋門,好多連接前後場同埋撕破對手防線嘅工作已經交咗畀尼馬。尼馬唔單止場均傳球多過美斯,佢今季聯賽場均5.4次成功過人,為五大聯賽之冠,場均多過美斯兩次咁多。喺博犯規方面,尼馬場均4.5次,又係五大聯賽最多,場均又係多過美斯兩次。仲有,喺為隊友製造攻門上,尼馬場均2.9次,而美斯只係2.4次。尼馬已經成為巴塞馬力最強嘅進攻發動機。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載