› 選擇地區
三藩市
紐約
洛杉磯
其他美國地區
香港 台灣 北美
 
2017年03月22日

求驗客手記︰舊隊友教中甲兩場即炒
施丹干地出色斑馬

祖記00/01大軍家陣好多變晒出色教頭,干地(下排左一)同施丹(上排右二)都係冠軍級人馬,不過費拉拿(上排左三)就啱啱被炒魷。資料圖片

皇家馬德里同巴塞隆拿兩大西甲豪門,專出金球獎得主,不過意甲冠軍祖雲達斯都有專長㗎,就係專出教練;英國傳媒就心水清,睇番00/01球季嘅「斑馬兵團」,27人大軍名單竟然已經有14位榮升領隊或教練,包括車路士領隊干地同皇馬教練施丹等,但最慘都算係費拉拿,新季教咗兩場就俾中甲嘅武漢卓爾炒魷。

肥安門生14個教波

前曼聯領隊費格遜,都算得上桃李滿天下,麾下球員好似曉士同布魯士等都成為出色領隊,新一代教練宗師就可能係「肥安」安察洛堤,00/01年佢帶祖記雖然屈居意甲亞軍,歐聯仲喺分組賽出埋局,季尾離開後就由納比接手,不過一眾子弟兵好多喺退休後就成為咗教頭,計計埋埋仲有成14個。
好似干地同施丹咁,前者今季堅威水,好大機會領車路士拎英超冠軍,呢個成就可以追平肥安喇,施丹教緊嘅皇馬,歐聯八強仲會對番肥安帶嘅拜仁慕尼黑,真係好一場師徒決鬥呀。除此之外,射手恩沙基之前都教過AC米蘭,家陣就轉教丙組球隊威尼斯,至於中場鐵漢戴維斯,亦都做過班列特嘅球員兼教練。

武漢卓爾炒費拉拿

嗱,家陣唔少出色嘅歐洲教練都會去中國搵食,呢一代嘅祖記都有人搵人仔,好似後備門將林佩拉,教過意丁球隊德東納之後,2012年就跟埋納比去到廣州恒大做門將訓練員。老牌中堅費拉拿,上季中開始擔任中甲武漢卓爾教練,帶球隊由護級邊緣升到第六位,不過強國人耐性真係差啲,武漢開季頭兩場只得一和一負,球隊周一晚就宣佈炒咗費拉拿,真係慘情。
其實唔單止前祖雲達斯球員搶手,連祖記教練都好受歡迎,現任教練艾基利由2014年開始帶祖記,已經連贏兩屆意甲,今季都睇怕冠軍在望,唔少豪門梗係爭住搵佢,之前已經傳過阿仙奴想搵佢頂雲格,最近就傳出巴塞隆拿都想搵艾基利接替宣佈季尾離隊嘅安歷基,不過巴塞歐聯八強就會對祖記,唔知呢個係唔係攻心計?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載