› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

求驗客手記︰重播技術睇越位
法國慘豬贏變輸

「球證、旁證、足協、足委........全部都係我嘅人,你點同我鬥?」呢個《少林足球》強雄金句,遲啲真係要改一改,事關國際足協可以引入更多電視慢鏡重播技術,周二法國主場對西班牙嘅國際賽,就出現兩次入球改判,結果西班牙以2:0勝出,日後強雄要收買,真係唔知畀錢第四旁證定負責播慢鏡嘅技術員,定收買個電視機好嘞?

或於18年世界盃使用

以電視慢鏡重播協助執法,上年世界冠軍球會盃已經推行,據報下季英格蘭嘅社區盾、德國嘅德國盃等比賽都會試行,如果技術成熟,2018年世界盃更加可能全面使用㖭。周二法國主場對西班牙嘅比賽,電視慢鏡就真係主導戰果,首先係下半場兩分鐘,法國有古沙華助攻畀基沙文頭槌先開紀錄,當時旁證就冇舉旗示意越位,呢位馬德里體育會前鋒當然慶祝啦,點知德國籍球證施華耶收到第四旁證嘅訊息,睇番慢鏡助攻嘅古沙華原來處於越位位置,入球亦都冇效。

洛里斯無視基奧特提水

法國入波變詐糊,不過西班牙就由詐糊變入波,77分鐘迪路菲奧接應佐迪艾巴傳中,近門射入,旁證原本就舉旗示意越位,不過睇完慢鏡後施華耶改判入波有效,西班牙就以2:0奠勝。法國教練迪甘斯賽後就話:「輸波當然失望,不過睇到科技對球賽嘅執法,有正面幫助,我相信球迷都會慢慢接受。」西班牙作客贏波兼保不失,一對中堅碧基同沙治奧拉莫斯,就分別效力巴塞隆拿同皇家馬德里兩隊世仇,不過碧基賽後就話,雖然自己好憎皇馬,但同皇馬球員關係好好,之前傳出同拉莫斯罵戰,都係傳媒炒作箒。
講番西班牙入第一球,就係靠中場大衛施華68分鐘射入12碼,施華仔亦都正式壓過希亞路,排名西班牙國家隊累積入球榜第四位,其實法國門將洛里斯,都唔係冇機會救出呢個12碼,法國前鋒基奧特喺施華仔主射12碼之前企喺禁區頂,手指指向右方,施華仔果然射右邊,可惜洛里斯唔信佢,撲向左邊下俾佢射入,洛里斯賽後或者心諗:點解我唔信「銀河唯一」呢?

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載