› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

杜利萊豁出去玩狂放!
罕有沙色馬竟然唔斷捱到

香港年過四十的騎師唔多,44歲的杜利萊是其中之一。呢位法國老將近排有復蘇演出,今個月開始枕住於谷草出擊,包括這晚(29日)以蔡約翰馬房「飛霞」爆冷勝出第二場五班1200米,個人近七場頭馬均來自谷草夜賽,佢同時為「飛霞」呢匹難贏馬打破季內齋缽,單Win及組合獨贏A2分別派101及34.5元。

五歲的「飛霞」是本港極少數沙色馬,亦與勝出舊年主席短途獎的澳洲名駒「尚多湖」同色,本身過往33戰一勝七位,唯一頭馬於谷草五班1000米由杜利萊在上季取得,今次重響勝鼓由同一騎師建功,途程則為五班谷草1200米。

杜利萊上仗復策「飛霞」於五班谷草1000米跑第二,不敵雷神座騎「金剛秀」。呢勻「飛霞」唔再跟前搵遮擋,杜利萊索性豁出去放頭跑,沿途狂放帶離幾個馬位,結果直路沒有腳軟,俾佢捱到返嚟率先衝線,以馬頭位之微勝出。

反觀梁家俊座騎「金碧輝煌」姍姍來遲,影相飲恨做二奶,跑多一步已過了「飛霞」,六歲馬「金碧輝煌」由李易達轉至容天鵬馬房後,表現顯著改善,這晚取得服役首次上名。今場三、四名分別為「喜盈盈」及大熱門「金剛秀」,四重彩派一萬蚊多啲。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載