› 選擇地區
三藩市
紐約
洛杉磯
其他美國地區
香港 台灣 北美
 
2017年03月30日

咖喱牛腩:曼聯做緊上季利物浦 - 咖喱

踢完國際賽,四大聯賽又返嚟嘞。呢個周末就係四月,英超前四之爭都去到最後直路,暫時形勢係熱刺、曼城、利物浦、曼聯(圖)同埋阿仙奴爭三個位,換言之會有兩隊最終跌出前四名。究竟邊隊最危?小弟覺得係曼聯。
曼聯終於擺脫咗第六位,上輪升咗上第五,落後第四位嘅利物浦四分,但踢少兩場,就咁聽落,紅魔失分仲少過紅軍,應該有優勢先係㗎,點解會話佢哋劣勢呢?因為曼聯季尾硬仗連場,同時佢哋又唔似利物浦咁叻對強隊,紅魔喺前六名聯賽嘅成績淨係好過阿仙奴,對強隊勝算唔高。先睇賽程,曼聯嚟緊仲要對車路士、曼城、阿仙奴同熱刺四支前六勁旅,此外,仲要對西布朗、愛華頓同修咸頓三支上半版球隊。
曼聯今季暫時對上游球隊成績麻麻,喺前六名對碰當中,僅贏一場,另外和三場同輸兩場,勝率得17%,場均得分係一分。若果計曼聯今季對前10名球隊嘅戰績,就係11戰三勝六和兩負,勝率都係得27%,場均得1.4分。以曼聯上半季對強隊嘅表現睇,佢哋爭四前景真係唔樂觀。
除咗聯賽賽程難踢,曼聯季尾嘅體能負擔都大,因為佢哋要踢歐霸盃。前車可鑒,利物浦上季同曼聯嘅情況有啲似,聯賽要爭四,歐霸盃又踢得順,最後結果係歐霸盃臨尾香得亞軍,而聯賽就只係得第八位。唔知曼聯會唔會同上季嘅紅軍一樣下場呢?
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載