› 選擇地區
三藩市
紐約
洛杉磯
其他美國地區
香港 台灣 北美
 
2017年04月02日

求驗客手記:球星餐廳衞生好唔掂
謝四傑斯嗱渣風味

呢期香港Chok王廚神嘅飲食節目,瘋狂喺面書洗版,好多人都批評佢唔識煮嘢食;嗱,我大求俠講句公道說話,睇佢節目嘅觀眾,都不外乎欣賞Chok王嘅型仔樣啫,做咩又邊有人理。好似英國球壇兩大名宿謝拉特同傑斯,開設嘅餐廳都俾英國衞生部評低分,不過又有乜所謂,幫襯佢哋都應該係球迷,志在見一見偶像啫。

謝四餐廳得零分

唔少英超球員踢緊波已經安排後路,搞吓小生意都好常見,利物浦名宿謝拉特同曼聯名宿傑斯,都分別係利物浦市同曼市開設餐廳,不過英國《太陽報》就玩踢爆,話謝四開嘅「The Vincent」就最羞家,評分以五分為最高,但只係得零分,傑斯開嘅「George's」就好啲啲,不過都係得兩分,處於唔合格水準。英國衞生部門發言人仲表示:「餐廳食物唔安全,作為衞生部門,我哋必須執法,保障市民安全。」
其實兩間餐廳消費都唔平㗎,好似The Vincent提供早午晚餐同下午茶,而且好多元化,連壽司都有得食,一個晚餐主菜以20鎊(約195港元)起,有10件嘅細壽司餐就要成19磅(約185港元),海鮮壽司就以兩鎊(約19蚊)一件起計,壽司、魚生呢啲高風險食物,如果製作過程唔衞生就真係好大鑊。最搞笑係英國衞生部門係發放一張評分證明,餐廳應該放喺當眼處,不過兩間餐廳竟然學人人側側膊,夠膽死唔擺呢張證明出嚟。不過衞生部門警告之後,兩間餐廳都承諾會改善衞生環境咁話。

借啲意收埋評分證明

謝四同傑斯為咗挽救餐廳信譽,就應該要落多啲鋪頭,日日喺度打躉,食足三餐都冇屙冇嘔,畀番啲信心食客,又可以做生招牌,吸引更多球迷嚟朝聖,講真,啲人去幫襯,唔多唔少都係因為佢哋兩個大名啫。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載