› 選擇地區
三藩市
紐約
洛杉磯
其他美國地區
香港 台灣 北美
 
2017年04月10日

同人唔同命!
騎師田泰安撲飛失敗 三位同僚卻VIP房睇波

沙田馬場今日(9日)有兩場二級賽上演,好多明星馬有份參戰,相信會吸引到好多馬迷入場。而對唔少外籍騎師嚟講,呢幾日都係party time,潘頓專登唔返澳洲悉尼跑大賽,約埋Ironman郭能同史卓豐等朋友,睇香港國際七人欖球賽。

三個人連同佢哋嘅老婆、女友喺剛周五收操後,下晝齊齊喺大球場貴賓廂房開P,真係令人羨慕,不過佢哋略嫌「斯文」,竟然穿裇衫西褲入場,冇學其他球迷咁扮鬼扮馬。

講到潘頓,幾季前雷神莫雷拉仍未嚟香港發展,潘頓同韋達二人爭香港冠軍騎師,爭到火紅火綠,佢哋都冇乜兩句,但韋達同潘頓卻有共同嗜好,同樣入咗大球場睇七欖,不過韋達好低調,同囝囝一齊走上看台山頂位靜靜哋睇波。

韋達雖冇入貴賓廂房,但總好過另一騎師田泰安撲唔到飛,得個恨字,好在田泰安今日有唔少實力馬列陣,尤其第十場隻「奮鬥雄心」忠心得可愛,今季跑6場得2冠3亞1季全入三甲,上仗只輸畀大超班馬「當家精選」兩馬位入Q,一啲都唔失禮。安仔講明今場冇超班對手,最有威脅只係「一定賺」,計實力「奮鬥雄心」有機會贏出今季第3WIN。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載