› 選擇地區
三藩市
紐約
洛杉磯
其他美國地區
香港 台灣 北美
 
2017年05月11日

佳龍駒可參選馬王!

「佳龍駒」戰死沙場,令人傷心同婉惜,事後好多馬迷都希望「佳龍駒」可以當選今屆馬王,以一個最高榮譽紀念一代良駒。過去未試過有退役馬選馬王,今次「佳龍駒」嘅情況前所未有,呢幾日亦有唔少討論,想知候選馬王有冇限制,擔心「佳龍駒」唔符合入圍資格。

選馬王嘅評審分別有馬會同評馬協嘅代表,現時嘅入選條件,係上一輩評馬前輩有份參與制訂,老一輩觀念比較保守,一直傾向唔揀退役馬做馬王,當中亦有唔想馬主尷尬等考慮。不過,呢班評馬老行尊已經相繼退出評審,現時評審其實唔使太拘泥以往嘅不成文規定。

據知馬會幾年前都曾經修訂過馬王嘅候選條件,只要係香港賽駒就得,並冇明文規定要係現役馬,即係「佳龍駒」絕對合乎候選資格,相信馬會對「佳龍駒」選馬王亦持開放態度。

想「佳龍駒」有份選馬王,並唔係感情用事。純粹計今季成就,「佳龍駒」亦係實至名歸,係本地歷來第一匹四歲三冠王。雖然「佳龍駒」未贏過國際一級賽,但呢個因素唔影響佢當選馬王,佢嘅蹄下敗仗就包括香港一哩錦標盟主「美麗大師」,以及差啲贏出女皇盃嘅「巴基之星」,兩隻都曾經俾「佳龍駒」掟甩贏,已經係級數同實力嘅最佳證明。希望稍後「佳龍駒」順利入選今季馬王候選名單,若最終當選馬王,相信係眾望所歸結果。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載