› 選擇地區
三藩市
紐約
洛杉磯
其他美國地區
香港 台灣 北美
 
2017年05月11日

咖喱牛腩:戰歐聯誘球星 - 牽牛

星期日提早慶祝母親節,喺酒樓食飯期間無意中睇到大台所謂4K新劇,劇本大綱仲講港女比唔上中、台佳麗咁嬌柔,都已經out out地;而且個所謂4K效果,只不過好似將畫面搞到好矇,一啲都唔吸引。女主角係嗰位細細個已經睇嘅中女之餘,演繹女強人風格千篇一律,真係睇一陣已經冇興趣。大台口口聲聲想拍戲賣埠去大陸,不過就真係不知天高地厚,小弟最近開始睇大陸熱播嘅《人民的公義》,大膽咁講貪污,題材已經吸引過大台劇多多聲,製作又認真得多,我真係唔知大台點樣說服國內觀眾去睇港劇。
冇競爭自然冇進步,大台冇咩進步,同以往競爭者不思改進有關;阿仙奴(圖)連續18年打入歐聯,不過亦都連續七屆16強出局,一切都好似嚟得理所當然,今季英超阿仙奴爭前四陷頹勢,都係時候畀雲格反省吓,相反畀一啲新面孔踢吓歐聯都係好事。
利物浦拎過五次歐聯冠軍,當然唔係新面孔,不過由高路普帶隊戰歐聯,就真係未試過,下屆就好大機會成事;2013年高路普帶多蒙特入歐聯決賽,可惜輸畀德國強豪拜仁慕尼黑,都真係幾可惜。
身邊唔少紅軍死忠朋友,其中一位就成日自嘲紅軍係二線球員組成,其實呢個理論都好似高路普早幾日講嘅嘢,冇穩定嘅歐聯出線資格,真係比較難吸引球員加盟,唔通同個球員講,利物浦係歷史名城咩。而且下屆有歐聯,對留住菲臘比古天奴都好大幫助,𠵱家巴塞就吼住佢,如果出埋尼馬做說客,紅軍要留都真係好難。
點都好,利物浦都要做好本份,餘下兩場聯賽贏晒,確保前四位置先。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載