› 選擇地區
三藩市
紐約
洛杉磯
其他美國地區
香港 台灣 北美
 
2017年05月16日

求驗客手記︰名宿聚首見證滅魔
告別白鹿徑

經過118年漫長歲月,在彩虹高掛下落幕。自從喺1899年開始作為熱刺主場嘅白鹿徑球場,喺周日上演最後一戰。熱刺喺呢場英超不負球迷同咁多位歷代名宿嘅期望,以2:1擊敗曼聯,鎖定今季英超亞軍兼保持聯賽主場不敗,以球會喺英超歷來最好成績,為白鹿徑送別。

相關新聞:「家陣唔想踢英超」摩佬輸波發晦氣玩華麗轉身

挫曼聯2:1 穩坐次席

白鹿徑球場今季後就會全面拆卸,興建新球場。經過118年,熱刺喺白鹿徑第2,620場亦係最後一場比賽,領隊普捷天奴派出強陣迎戰曼聯,開賽六分鐘就由雲耶馬頭槌建功開紀錄,到易邊後三分鐘,哈利卡尼門前搶點成功射成2:0。雖然曼聯已經放眼下星期三歐霸盃決賽,今場再次派弱陣出擊,但都唔係完全冇戰鬥力,喺71分鐘由朗尼追番球,之後後備入替嘅拉舒福特都有黃金機會但把握唔到,結果紅魔冇搞寸到白鹿徑party,熱刺開開心心贏2:1。
熱刺贏波後有80分亦鎖定今季聯賽亞軍,兩項都係球會喺英超歷來最佳成績;加上喺主場17勝兩和不敗,係繼1964/65球季以來,首次喺聯賽保持全季主場不敗,作為送別白鹿徑,呢份禮物算係夠份量。
比賽結束,刺迷情緒更加高漲,紛紛湧入球場把握同白鹿徑草皮接觸嘅最後機會,亦有球迷拆凳留念。熱刺喺下季會移師去溫布萊做主場,新球場預計會喺18/19球季啟用,不過就唔會叫番做白鹿徑咯。
作為白鹿徑派對嘅配角,曼聯領隊摩連奴就冇乜癮,事關輸波後紅魔正式宣告無緣爭前四,賽後佢都諗到記者想問乜,搶住噏一輪嘢之後話:「我哋都唔想踢英超比賽。」

月尾友賽傑志已賣兩萬飛

至於熱刺呢個月26號喺大球場同港超聯冠軍傑志踢表演賽,門票噚日開始喺購票通同各售票處發售;噚朝仲有唔少球迷冒雨去各售票處購票,連同之前率先訂購嘅約8,000飛,加埋少量內部認購,首日共售約20,000張,反應算唔錯喎。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載