› 選擇地區
三藩市
紐約
洛杉磯
其他美國地區
香港 台灣 北美
 
2017年06月07日

求驗客手記:用舊相着死對頭件衫
C朗廣告關公災難

基斯坦奴朗拿度(C朗)上周六喺歐聯決賽個人梅開二度,幫皇家馬德里捧盃之餘,自己仲做埋神射手,咁威水嘅時刻,點會唔用嚟賣廣告吖。長期贊助C朗嘅美國運動品牌「一剔」,周日就即刻出個「This boy knew」嘅廣告,用番C朗之前效力緊士砵亭嘅細路仔相,sell吓青澀,原本都冇咩問題,C朗仲放上個人ig,都呃咗超過三百萬個like𠻹

不過,我求大俠睇睇吓覺得好面善,有網民心水清,即刻搵番C朗啲舊相,竟然發現C朗以前曾經着過一剔嘅死對頭、德國運動品牌「三間」嘅衫影相。兩張相再對比一下,橫睇掂睇似係同一張相,只係一剔嘅廣告用咗This boy knew字樣同一剔logo,遮住對手個logo,再加埋用photoshop校吓色同小畫家crop圖,被網民狅插,突然搞個關公災難出嚟,真係唔知一剔點收科好。

又贏美斯居百大之首

不過C朗呢期真係威到盡,因為美國《ESPN》周一公佈嘅全球100大運動員,C朗又贏美斯多一次,排名第一,NBA騎士嘅勒邦占士同美斯就分列第二同第三。呢個運動員榜嘅統計都幾多元化,除咗運動成績,仲要計埋一年搵幾多錢,甚至連面書、ig有幾多追隨者都計埋,C朗上年搵3,300萬美金(約2.6億港元),雖然低過勒邦占士,但勝在網上人氣夠,面書過億追隨者,所以排名第一。C朗就連電玩界都睇齊美斯,向來好受年輕人歡迎嘅電玩《FIFA18》周一公佈咗封面人物,係第一次登上佢哋封面嘅C朗。C朗嘅宿敵美斯曾經做過2013至16年嘅《FIFA》封面,舊年嘅封面人物係馬高列奧斯。

皇馬八子成歐聯最佳

另外,歐洲足協周日公佈今屆歐聯18人最佳陣容(見附表),冠軍皇家馬德里理所當然成為大贏家,有八人入圍;祖雲達斯雖然決賽失四球,不過門將保方、中堅邦路斯,連同中場比真歷入圍;八強止步嘅巴塞隆拿就失望啲,只有阿根廷前鋒美斯有得入圍。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載