› 選擇地區
三藩市
紐約
洛杉磯
其他美國地區
香港 台灣 北美
 
2017年06月08日

求驗客手記:為買盧卡古再變法
干地玩復古4-2-4

上季幫車仔變陣3-4-3後變埋英超寶座返嚟嘅干地,據講為遷就新前鋒盧卡古來投,來季諗住又變陣,大玩復古嘅4-2-4陣式。如果連4-2-4都掂埋,咁下季英超仲邊個夠佢玩?
干地舊年10月喺英超三場不勝嘅頹勢下,提早將佢嗰套3-4-3哲學應用喺車仔身上,結果球隊脫胎換骨,最尾仲捧埋英超,呢個陣式亦喺英超大行其道,上至熱刺曼聯,下至史篤城屈福特都有用過,連出名食古不化嘅雲格,季尾都玩埋3-4-3。不過,車仔下季係咪仲用3-4-3延續強勢?英國《太陽報》就話未必。

心目中最理想陣式

盧卡古周二自爆即將同一間球會簽約,喺談話中,又暗示呢間球會似係一間下季有得踢歐聯嘅英超球會,好多人都估唔係車仔就係曼聯。考慮到曼聯主帥摩連奴就係當日將盧卡古踢出車仔嘅人,加上盧卡古本人一直心繫呢間前球會,所以差唔多七成人估佢下一站係重返史丹福橋。《太陽報》就指,干地想畀盧卡古同迪亞高哥斯達雙箭齊發,因此3-4-3已經唔適用,想擺大頭踢更進取嘅4-2-4,即前線四人係呢兩位中鋒,加埋夏薩特同柏度洛迪古斯兩位翼鋒,而兩位中場正路就係尼高路簡迪同尼曼查馬迪,但如果理想啲,干地想簽巴黎聖日耳門嘅馬高華拉堤代咗馬迪,咁樣先算完美。
其實4-2-4係復古陣,巴西當年捧1958同70世盃,都係用呢個陣,而最近意大利國家隊主帥雲杜拉早前都有試過呢個陣,而干地舊年11月亦提過,4-2-4先係佢最理想嘅陣式,咁樣踢先更具威力,就睇吓呢位戰術先鋒下季係咪真係能如願以償。

般茅百萬周薪斟泰利

另外,已宣佈離隊嘅泰利,6月30日就回復自由身,而最新消息話般尼茅夫已經同佢展開談判,並願意開出10萬鎊周薪(約100萬港元)嘅合約邀請佢,薪酬冠絕全隊。佢下年亦有機會同前英格蘭國家隊隊友迪科爾重逢,皆因後者周二已過般茅體測。
泰利離開,令干地急需增加後防兵源,目標指向祖雲達斯中堅邦路斯。除咗祖記舊將外,干地亦希望再添意甲兵,包括羅馬德國後衞魯迪格等,慕遜加柏嘅維斯達加特亦完成借用條款,下季將回流車仔。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載