› 選擇地區
三藩市
紐約
洛杉磯
其他美國地區
香港 台灣 北美
 
2017年06月08日

咖喱牛腩︰染紅救港超 - 牽牛

特衰政府𠵱家真係好似燒山、比利等烏鴉口齊名,班高官日日唱淡樓市,一時又話加息周期到,一時又話市民負擔比率係20年嚟最高云云,仲用埋啲所謂辣招控制樓市,夠膽死講𠵱家有六、七成係首置人士,呢班係真正用家,冇晒投資者,俾紅色通緝令追緝嘅貴哥,都已經不斷爆料,講強國點樣溝淡香港人,除咗每日150個所謂單程證配額,大公司又可以幫高層申請專才,讀吓書轉頭又有身份證,大大話話一年增加十幾廿萬所謂新香港人,呢班國內擁有大額資產,一拎到身份證就用首置身份買香港樓,香港政府真係吹佢唔脹,最好笑話限制樓按成數,呢班大帝買樓等於買餸,一炮過又怕乜你限。
香港球市一池死水,連百年老店少林寺(圖)都唔踢港超,寧願自降甲組,真係悲涼;嗱,香港人最叻就係能屈能伸,球市冇人投資,最好就梗係搵強國大水喉,地產隊上季開始喺港超插旗,雖然只派一班青年軍落嚟比賽,戰績仲麻麻地,不過起碼都叫多隊港超球隊啦,符合CEO嘅假大空精神。
地產隊仲建議新一季搬番去廣州做主場,引起香港球迷反彈,小弟就真係諗唔通,香港最大問題係土地問題,地產隊喺港超嘅比賽,多數都係小貓三四隻,既然係咁,等佢哋返廣州打餐飽,唔好霸住個球場,一來唔影響康文署班管場阿姐收工,二來又開番啲跑道,畀廣大市民練吓跑,何樂而不為。
777競選時就懶係關心香港足球,仲去球場打打氣,佢咁好打,不如就規定有幾多十億資產嘅香港上市嘅強國公司,都要搞隊波,咁港超就一定有救啦!
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載