› 選擇地區
三藩市
紐約
洛杉磯
其他美國地區
香港 台灣 北美
 
2017年06月28日

【波濤洶湧】主打AV女優
引咗成大班麻甩佬入馬場

早前,眼大大得嚟兼身材又勁嘅AV女優明日花,唔單止演技出色,就連賭馬都有一手。佢攞咗30萬Yen,於日本打吡賽日尾場,亦即草地2500米二級賽目黑紀念,一嘢買落去法國騎師李慕華座騎「成名遊戲」的獨贏。

其後佢仲將張馬飛上載到社交網站,任睇唔嬲。結果真係俾佢扑中19.1倍冷WIN,捧走573萬Yen(折合約40萬港元)返屋企。贏大錢之後,明日花自稱「最強之馬券師」,認真巴閉。

據稱因為呢次明日花贏咁多錢,惹嚟一股賽馬熱潮,仲有唔少男士講明6月尾跑一級賽寶塚紀念賽嗰陣,會去阪神競馬場走一轉,睇吓有冇機會撞到明日花。

日本中央競馬會班Marketing食住呢樣嘢,就搵咗一班身材極好的姑娘再煲大佢,例如搵咗擁有H Cup身材、年紀只有23歲的筧和美子,於今個月做當地賽馬大使。美子影咗輯靚靚寫真,仲喺幾場分級賽為馬會擔任嘉賓。

其實打靚女牌,一向都係當地馬圈拿手好戲,好似女團乃木坂46人氣成員白石麻衣,就同埋前任AKB48成員小嶋陽菜做賽馬節目主持。咪以為佢哋只係坐喺度齋講做花瓶,仲要落地做埋採訪㗎!

記得當年「黃金巨匠」出爭法國凱旋門大賽時,小嶋陽菜拍住白石麻衣去到當地,做特派記者為大家現場報料,兩個人仲俾埋貼士,做得相當投入。

今年日本中央賽馬會都搵嚟幾個90後少男少女拍宣傳片,就好似土屋太鳳咁,出晒名笑容可鞠,夠young夠活潑。佢話賽馬好刺激,早前於大阪盃以及日本打吡賽日都有入場,仲同國寶級騎師武豊影相留念㖭!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載