› 選擇地區
三藩市
紐約
洛杉磯
其他美國地區
香港 台灣 北美
 
2017年08月10日

咖喱牛腩:藍月更圓 - 咖喱

英超星期五就開鑼,今季邊支球隊會贏冠軍?唔少英國傳媒同球評人都睇好呢季係曼市雙雄嘅世界,因為曼城同曼聯留得住想留嘅主力之外,仲大事擴軍,改善咗上季嘅弱點,例如曼聯差個防中接班卡域克,今夏就買咗尼曼查馬迪返嚟;而曼城啲兩閘又老又慢,今夏就買咗基爾獲加同班捷文文迪,可以兩閘齊飛。
如果將曼市雙雄比較,曼城比曼聯強嘅地方係板凳深度。曼聯嘅中場好依賴保羅普巴,中場係得佢有推進同派牌能力,但曼城唔同,奇雲迪布尼、大衛施華、根度簡、貝拿度施華以至老將耶耶托尼,個個能力全面,傳、射、突俱佳,全部都可以負責轉守為攻、派牌同埋持球突破嘅工作。有呢班星級中場,相信呢季曼城嘅中場控制力會更強。
上季,曼城嘅防中費蘭甸奴踢得好辛苦,一來佢係單防中,二來佢成日要去兩隻閘度補位,因為沙格拿、高拉洛夫等覆蓋範圍有限,但曼城今夏簽咗獲加、文迪同埋丹尼路雷斯返嚟,大大加強曼城邊路的實力。哥迪奧拿(圖)以前教巴塞隆拿嗰陣畀右閘丹尼爾好大自由度,等佢可以成日上前助攻,上季好難用得着呢招,但今季有獲加同文迪,哥迪奧拿嘅戰術會更加立體。每當曼城中前場圍攻對手嗰陣,獲加或者文迪就可以伺機喺弱邊殺上嚟,好似把尖刀就刺向對手防線。
不過,如果你問我曼城最大隱憂係乜,小弟會答係門將艾達臣摩拉斯。艾達臣由葡超嘅賓菲加加盟,真係唔知佢適唔適應到英超。哥迪奧巴禾就係例子,佢喺巴塞同埋智利國家隊嗰陣好似堵牆咁穩健,但上季踢到英名盡喪。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載