› 選擇地區
三藩市
紐約
洛杉磯
其他美國地區
香港 台灣 北美
 
2017年08月24日

Thursday:增兵玩懷舊 - 牽牛

嗱,雖然𠵱家好多憤青都鬧大台,但對我哋呢啲中坑,大台都唔係一無是處嘅,當然唔係講緊套打鬥新劇,要做慣慈母嘅影后,轉行做犯罪集團大家姐,講句對白都引人發笑;而係星期日搞嘅金曲節目,搵番好多八、九十年代都叫紅過吓嘅歌星出嚟。好似呢個星期日,啱啱放工返到屋企,竟然聽到黎明詩唱歌,年輕人梗係以為我打多個詩字,唔係黎明,真係黎明詩。佢大約90頭出道,迷倒唔少少男,包括本人,CD呀,Yes卡呀收藏唔少,星期日有幸聽番佢唱兩首歌。
電視台販賣吓舊回憶就冇咩問題,足球隊就唔多掂啩!英超開季進行兩周,連敗球隊當中,最意外就真係韋斯咸;作為倫敦球會,又用奧運球場做主場,驚六萬座位坐唔爆?今季擴軍就以名氣行先,曼城孖寶門將赫特同右閘薩巴列達,仲有「小豆」查維亞靴南迪斯、同「奧地利伊巴」阿拿奧杜域,名氣就響,不過踢落就麻麻。槌仔幫眼見防守唔掂,想買士砵亭防中威廉卡維奴(圖),佢出道時吹過阿仙奴、皇馬等大會想買佢,但越踢越冇進步,到𠵱家25歲仲留喺士砵亭,加上俾球會外借過,就知道冇乜料到。或者韋斯咸本住人棄我取,諗住簽佢做救世主啩!每隊英超球隊直播收益都近億鎊,佢哋出手買人,其他球隊唔提價就奇,所以英超球隊負責買賣人士都真係有苦自己知,但與其畀高人工簽大牌老將,不如簽啲更有效益嘅新星。文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載