› 選擇地區
三藩市
紐約
洛杉磯
其他美國地區
香港 台灣 北美
 
2017年08月24日

夏日求驗客:紅軍舊將歐聯附齊輸 羅渣士In巴神Out - 求驗客

兩位前利物浦舊將,周二就領軍分途出戰歐聯附加賽次回合,雖然都係輸波收場,但命運就好唔同;前利物浦領隊羅渣士帶隊嘅些路迪,作客哈薩克鬥艾斯坦拿輸3:4,爆出100倍「主其他」波膽,好彩首回合贏得夠多,仍然以兩回合計贏8:4,照樣晉級分組賽。而前利物浦前鋒巴洛迪利效力嘅尼斯,就主場再吞拿玻里雙蛋,要轉戰歐霸盃嘞。

些路迪輸3:4照踢歐聯

些路迪首回合主場已經大幅領先5:0,次回合仲要完半場前由前曼城攻擊球員史葛冼佳亞入波,拎到重要作客入球,追成1:1平手,即係下半場要失多六球輸1:7先會出局,如果以為出線十拿九穩,就太過年輕嘞。艾斯坦拿貴為哈薩克冠軍,強悍主場都威力十足,四分鐘內連入兩球,加上杜馬斯69分鐘射入個人第二球,一度領先至4:1,距離出線仲爭三球。不過谷得太上,搞到後防空虛,些路迪其後有尼查姆及利治格菲斯先後喺80和90分鐘各入一粒,追成3:4,粉碎主隊出線希望,些路迪就算輸波,仍然以兩回合計8:4晉級。

尼斯吞四蛋出局玩歐霸

有驚無險晉級,些路迪領隊羅渣士都要讚一讚對手,佢話:「艾斯坦拿真係值得一讚,佢哋拼盡所有,希望收復首回合失地,轉陣、轉戰術,以全攻姿態向我哋進襲。」
些路迪輸波出線,巴神效力嘅尼斯就冇咁好彩,周二次回合主場對拿玻里,首回合已經落後0:2,尼斯今仗派遣巴神正選外,仲有前國米中場史奈達領軍,但拿玻里始終技高一籌,荷西卡利祖同恩斯治尼各建一功,再以2:0勝出,總比分4:0大勝打入分組賽。翼鋒荷西卡利祖賽後就話:「拿玻里屬於歐聯舞台,兩回合都踢出自己風格,我哋希望分組賽維持表現。」至於西維爾、奧林比亞高斯同馬里博爾都係同日晉級,不過,馬里博爾就靠作客入球優惠晉級,有啲夠運。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載