蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月09日
馬上成為壹會員

古仔復操 張伯倫賣口乖
高路普鬥曼城好煩惱

轉會窗閂咗,「被逼」留喺利物浦嘅中場菲臘比古天奴,幫巴西踢完國際賽後,周四已經「傷癒」回歸美爾活開操,領隊高路普冇懲罰性要佢獨自操練,而且古天奴與同西班牙守將艾拔圖摩蘭奴有講有笑,似乎係雨過天青。不過高路普暗示,紅軍喺周六英超作客曼城場大戰,古仔未必會披甲上陣。

25歲嘅古仔因為聲稱有背傷,喺紅軍今季首三場英超以及兩場歐聯附加賽都冇上陣,不過喺過去一周兩場世盃外,就有為巴西國家隊披甲。雖然古仔喺周四終於復操,但領隊高路普接受訪問話,未必會即刻畀佢喺周六大戰上陣:「過去幾星期古仔受背傷困擾,冇錯佢啱啱喺國際賽有代表巴西上陣,但我哋要為一整個球季做準備,到下一次國際賽期之前,己隊有7場比賽要應付,唔可以單睇佢啱啱復操就認為可以即刻派佢上場,咁樣並唔合理。」

至於紅軍新兵阿歷士張伯倫,喺啱啱嘅國際賽期亦有唔錯發揮,佢接受球會官方電視台獨家訪問,佢仲賣口乖咁講:「即使你只係睇到佢(高路普)上一季執教,就知佢係個非常有個人特色嘅領軍,可以激勵球員。即使你唔係呢隊波嘅成員,都可以感受到佢嘅熱情同對比賽有幾重視。」

聽到張伯倫咁樣讚高路普,就知佢成功加盟紅軍有幾咁happy啦,呢位24歲英格蘭國腳仲話跟高路普自己踢咩位都所謂喎。利物浦加埋啱啱喺國際賽爆晒seed嘅活特本,對曼城真係人材濟濟,事關陣中已經有埃及美斯沙拿、文尼及法明奴組成嘅埃及文明組合,近三場聯賽勇到爆,就算古仔趕唔切呢場回歸,高路普真係有幸福的煩惱,又睇下紅軍到時點排陣。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載