› 選擇地區
三藩市
紐約
洛杉磯
其他美國地區
香港 台灣 北美
 
2017年09月22日

求驗客手記:一個入得 一個跳得
曼聯闖16強

英聯盃禮拜三第三圈冇爆冷,衞冕曼聯比起上場英超輪換咗九個之下,靠拉舒福特兩射一傳,主場4:1炒英冠伯頓,輕鬆入16強後會作客史雲斯。

不過,領隊摩連奴好老實咁話如果唔使踢呢個盃仔,英超隊可以喺歐洲賽事拎到更好成績。

摩佬:冇英聯盃或更好

摩佬今場大變陣,周日英超4:0大勝愛華頓嘅正選中,得番拉舒福特同桑馬達喺度,但係踢咗五分鐘已經有拉舒福特開紀錄,12分鐘後佢又入一球,加上連格36分鐘嘅射門,省中對方後衞端納入網,曼聯上半場輕鬆領先三球。下半場,到安東尼馬迪爾喺60分鐘接應福仔傳送奠勝攻入4:0一球,伯頓補時破蛋拎個安慰獎,曼聯就咁晉身16強鬥「天鵝」。
雖然又一場兵不血刃嘅大勝,而且域陀連迪路夫、卡域克一班後備球員難得正選上陣,但摩佬接受《BBC 5》電台訪問嗰陣都係唔多滿意︰「如果你問我,冇呢個比賽英格蘭球隊係咪會更好,(我會話)有可能,或者我哋可以更加精力充沛咁應付歐洲賽。」

普巴舞王上身快復出

不過,上屆帶領曼聯喺決賽擊敗修咸頓、五奪英聯盃嘅摩連奴都戴番頭盔︰「呢個係正式賽事,我希望球員都係咁諗,我哋要尊重贊助商同對手咁去盡力比賽。如果可以贏到嘅就贏,如果贏唔到就係因為對手更出色。」另外,之前喺歐聯拉傷腿筋、有傳要唞三個月嘅保羅普巴,喺ig post段跳舞片,雖然右腳仲有少少趷,不過見佢跳得咁開心,應該可以比預期快復出啩。
包括紅魔鬥史雲斯在內,英聯盃16強有三場全英超戲碼,另外兩場係熱刺喺溫布萊迎戰韋斯咸,同埋車路士主場撼愛華頓。不過話晒盃仔都係盃,英超有11隊殺入16強,另外五隊就係英冠隊,所以今季英聯盃其實都冇乜點爆冷。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載