› 選擇地區
三藩市
紐約
洛杉磯
其他美國地區
香港 台灣 北美
 
2017年10月09日

夏日求驗客:
歐洲列強入球騷 瑞典派蛋荷蘭慘 - 求驗客

周六晚嘅世界盃歐洲區外圍賽可謂入波停不了,九場賽事就已經轟入38球,其中A組瑞典就炒盧森堡八蛋;同組嘅荷蘭雖然作客3:1贏白俄羅斯,但踢完之後荷蘭繼續吊鹽水,落後次席瑞典三分,兼且得失球差被拉開到12球距離,周二最後一輪外圍賽,荷蘭同瑞典正面交鋒,荷蘭要淨勝七球先可以上第二,睇怕班國腳都可以諗定下年夏天去邊度度假咯。
較早開波嘅瑞典,雖然已經無咗「神塔」伊巴謙莫域壓陣,但攻力足以摧毀盧森堡呢支魚腩部隊,隊長格蘭基斯開紀錄後更即刻搶番個波,射手馬古斯貝治更上演「大四喜」,最終幫瑞典炒足盧森堡八粒,將得失球推高至19球。
晏啲開波嘅荷蘭為咗追番球差都精銳盡出㗎,不過橙衣軍團實力已經今非昔比,你睇吓連賴恩巴布都有正選就知啦!最終要等到下半場84分鐘後先連入兩球奠勝。雖然將同瑞典嘅得失球差拉近至12球,但以今時今日嘅荷蘭,下仗要大炒瑞典七球或以上,先可以踢附加賽,機會可謂微乎其微囉!

橙軍出線要炒瑞典七球

賽後荷蘭隊長洛賓就話會奮戰到最後一分鐘,對陣瑞典嘅大戰依然充滿信心,唔想等fans留喺屋企睇世界盃喎!當然明眼人都知道,呢啲都係門面說話啦,話唔定班國腳已經諗定暑假去邊度玩囉!教練艾禾卡特就話,對瑞典大炒盧森堡八粒嘅比數感到驚訝,直言唔敢相信;又話眼前雖然充滿困難,但一切仲未結束。球迷即管放長雙眼,睇吓荷蘭有咩板斧入到瑞典七粒囉!

葡萄牙下場贏瑞士搞掂

另外,B組次席嘅葡萄牙為咗留力周中對瑞士嘅榜首大戰,作客弱隊安道爾竟然夠膽收起C朗,結果上半場咪破關乏術囉,下半場出番C朗即刻入波做救世主,最終以2:0輕取對手。同組暫列榜首嘅瑞士雖然喺主場以5:2大勝匈牙利,依然領先葡萄牙三分,但得失球差仍落後八球之多,換句話講葡萄牙下場只要擊敗瑞士,大家就肯定可以喺下年世界盃見到C朗喇!
除此之外,H組前晚亦上演咗兩場「入球騷」,比利時同波斯尼亞炮製咗成七個入波,連愛沙尼亞亦大踢進攻足球,大炒直布羅陀六粒。唔知今晚出賽嘅歐洲強隊,會唔會延續呢股入波氣勢呢!各位朋友記得吼實啲大波膽,分分鐘有意外斬穫!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載