蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年10月09日
馬上成為壹會員

夏日求驗客:雙紅會唔使預 爆炸頭傷膝要唞 - 求驗客

比利時前鋒費蘭尼(9號)喺對波斯尼亞比賽踢到30分鐘即告受傷,至少唞幾星期。路透社

大鑊!上周六嘅世界盃外圍賽,曼聯中場「爆炸頭」費蘭尼幫比利時出賽傷咗,足總證實佢膝部韌帶受傷,要唞幾周,將錯過今個星期六同利物浦嘅「雙紅會」。
比利時已經確定出線,但29歲嘅費蘭尼喺歐洲區賽對波斯尼亞仍然正選上陣,踢咗30分鐘就玩完。教練馬天尼斯賽後話佢嘅傷勢都幾嚴重,有機會傷到膝部韌帶,第二日就證實佢要唞幾周,即係雙紅會唔使預佢。

簡迪亦傷車仔頭痛

費蘭尼狀態火熱,尤其保羅普巴同卡域克傷咗,自然得到摩連奴嘅重用,佢今季已經為紅魔射入四球同獻一助攻。盧卡古近日都有受傷傳聞,假如「新魔獸」真係中招,費蘭尼隨時可以客串踢前鋒。點知搞到咁,今次摩佬都幾頭痕啦。
另外車路士干地一樣頭痕,事關愛將法國中場尼高路簡迪亦喺同日國際賽受傷,仲要都係30幾分鐘嘅事!離開嗰陣,簡迪按實大髀,睇嚟都傷得唔輕。冇咗艾華路莫拉達,又冇簡迪,車仔周末至本月底要應付六場比賽,包括英超作客水晶宮、英聯盃對愛華頓,仲要先後硬撼羅馬兩次!紅魔車仔今次真係同病相憐啦。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載