› 選擇地區
三藩市
紐約
洛杉磯
其他美國地區
香港 台灣 北美
 
2017年10月18日

夏日求驗客:「CR7」酒店一歲生日
C朗豪送金球獎?

啱啱打破西甲入球荒嘅葡萄牙球星基斯坦度朗拿度(C朗)可以講係百足咁多爪,唔單止有個人內衣、香水品牌,甚至投資埋酒店業,食盡名人效應。C朗近年同酒店集團Pestana合作,喺葡萄牙、美國同西班牙開「CR7」酒店,暫時只有兩間葡萄牙分店落成咗,分別座落喺里斯本同埋佢家鄉馬德拉島;兩間酒店開業啱啱滿一周年,C朗好識做,送金球、蛋糕畀啲住客,直情好似想令佢哋住到唔想走!
雖然嗰啲送嘅金球唔係用真金白銀打做,但上面總算有C朗嘅親筆簽名,就算啲住客唔係C朗粉絲,如果將個金球賣出去嘅話,都應該可以收番唔少錢。除咗金球,C朗還為住客送上蛋糕,但個蛋糕似乎就普通啲,上面只係寫咗間酒店嘅名,同埋都唔係C朗親手整嘅。
C朗真人就冇現身酒店,但就係聯同Pestana嘅主席拍咗段片,話要同住客一齊慶祝酒店一周年,結尾仲送上招牌笑容,迷死一眾女粉絲。

艾斯高:唔夠C朗爭

即使已經有四間分店,C朗似乎仲未滿足。之前有報道話,C朗物色緊地點同合作夥伴,計劃喺西班牙伊比薩島開佢第五間「CR7」酒店。伊比薩島係西班牙嘅度假勝地,每逢暑假都有好多球星去享受陽光與海灘,C朗淨係做朋友生意都唔憂冇得賺啦。
另一邊廂,C朗今年繼續係金球獎嘅熱門得主,但皇馬教練施丹就冇開聲撐佢,反而撐佢嘅隊友艾斯高:「我唔想將任何一個人擺上台,金球獎係由人哋投票決定嘅,而我只可以話畀你聽,我好鍾意艾斯高,因為佢總係好有創意,而且一直都喺度嘗試,努力嘅球員最終都會取得成功。」
話晒C朗都係皇馬大佬,得罪佢恐怕唔會好過,艾斯高都好識做咁話:「C朗毫無疑問會攞獎,其他人好難同佢爭。」對於自己攞獎嘅機會,佢就話:「今次一共有30個人入圍,佢哋都係好好嘅球員,如果我入圍最後三強已好好喇。」咁識講嘢果然有「大將」之風喎!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載