› 選擇地區
三藩市
紐約
洛杉磯
其他美國地區
香港 台灣 北美
 
2017年10月20日

夏日求驗客:五隊戰歐聯 不敗坐榜首
英超盛世再現

禮拜三嘅歐聯分組賽,英超球隊繼續攞晒威!A組曼聯靠賓菲加龍門史韋拉派膠,連人帶波接咗入龍,作客1:0贏波三戰全勝;而C組嘅車路士就驚險啲,主場先贏兩球再俾羅馬連入三球,好彩完場前夏薩特頭槌頂入逼和3:3,三場有七分繼續排榜首,連同曼城、利物浦同熱刺,五支英超球隊目前全部係小組一哥呀!

曼聯靠對手膠龍贏波

紅魔上場英超作客利物浦悶和0:0,今場回歸歐洲賽場繼續派出強陣,不過贏控球就一路贏唔到比數,踢到64分鐘,曼聯喺左路近邊線位置有罰球,拉舒福特負責大腳斬入禁區,無心插柳下個波高飛曲墜直奔球門,賓菲加嘅18歲龍門史韋拉搏命向後退,仲跳起接實個波,不過佢雙腳已經完全企咗入網,就算向前伸直雙手都唔夠長,門線系統話已經過咗白界成為一個入波。曼聯就靠史韋拉嘅低級犯錯,作客以一球小勝最終有後衞安達臣雷沙奧兩黃一紅被逐嘅賓菲加,喺A組連贏三場排第一。
車路士方面,11分鐘大衛雷斯禁區頂撞射入靚波開紀錄,37分鐘到夏薩特近門撞入贏多球,之後就到羅馬嚟料,40分鐘高拉洛夫推左走右爆贏艾斯派古達,禁區左路大腳抽射近柱網頂,省到安達斯基斯坦臣後個波仲靚直飛入網。然後迪斯高64分鐘喺禁區第一時間球不着地左腳窩利射球靚波追平,六分鐘後呢位波斯尼亞國腳再頭槌頂入一粒,領羅馬反超前3:2。車仔最後保住不敗,全靠完場前15分鐘夏薩特喺12碼點頂個彈地波得手,追平3:3完場,車路士三戰得七分排榜首,羅馬落後兩分排第二。

車仔夏薩特追和羅馬

連埋禮拜二嘅歐聯,利物浦、曼城贏波,喺E組同F組都帶頭,紅軍就同莫斯科斯巴達同樣係五分,靠得失球差領先,藍月亮就同紅魔一樣三戰全勝領放。而熱刺作客打和皇家馬德里後,喺H組同皇馬同得七分,連得球同失球數字都一樣,所以並列榜首,換言之五隊參戰歐聯嘅英超隊目前都喺自己嘅組別領先,而且仲係未輸過,晉級形勢都幾好。
近年英超球隊喺歐戰成績就不及千禧年代中期咁威水,成為咗球迷嘅笑柄,睇吓今屆各隊都大有進步之下,有冇計威番年啦!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載