› 選擇地區
三藩市
紐約
洛杉磯
其他美國地區
香港 台灣 北美
 
2017年10月27日

一度帶離200米、最終仍大勝!
名宿:騎師判斷有問題

早排,南非馬壇出現咗一單過程同賽果都極之瘋狂嘅賽事,唔少馬迷知道呢場喺南非基維爾馬場上演嘅3000米平地賽後,都表示大吃一驚,唔相信眼前見到嘅係事實。

一開始,八匹列陣馬都好整齊咁出閘,但過咗第一個彎之後,見習騎師Serino Moodley鞍下的Run Rhino Run突然嚟個中段變奏,由起初處於領先位置,隨賽事時間過去,Run Rhino Run變得越帶越遠,甚至一度走出大外叠轉彎,粗略估計,人馬曾帶離馬群接近200米,所以就連捕捉賽事嘅鏡頭都唔多影佢,直程當呢匹馬唔係競賽嘅一份子咁。

平時有人話啲實力較弱會放頭,希望搏走甩贏馬,曾在2400米賽事中大敗50馬位嘅Run Rhino Run今次真係做到一次完美示範。馬群進入最後直路後,當中嘅騎師先發覺放到離行離列嘅Run Rhino Run真係走甩咗,就算俾盡力推騎下,依然追唔到前面嘅主角,結果人馬大勝亞軍21個馬位。

賽後,見習騎師Serino Moodley對賽果感到難以置信,並指只係按馬匹嘅節奏競賽,冇刻意使用大逃策略;另外當地名宿騎師Garth Puller認為前者只係見習生,有咁嘅狂奔過程只係唔夠經驗,不過佢就指責其他大師傅冇理由睇唔到匹馬走甩咁遠,都唔嘗試早啲去追,欠缺應有嘅判斷。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載