› 選擇地區
三藩市
紐約
洛杉磯
其他美國地區
香港 台灣 北美
 
2017年10月27日

夏日求驗客:雷神上身擊碎熱刺
槌仔幫High到爆

韋斯咸禮拜三晚英聯盃第四圈,就喺溫布萊「雷神上身」玩絕地反擊,克服半場作客輸畀熱刺兩球嘅劣勢,下半場連入三粒反吸!而且隊長麥克盧保完場後掉波衫上看台送畀自己球迷,仲引到一位大漢飛身出嚟搶,混亂之間就咁直接撻落地,可以見到一幫槌仔粉絲今場有幾High呀!

兩隊踢英聯盃都大變陣,熱刺領隊普捷天奴做咗七個變動,龍門洛里斯、中場基斯甸艾歷臣同埋前鋒哈利卡尼都被輪換,韋斯咸領隊比歷雖然個帥位危危乎,不過一樣為咗留力周末英超作客水晶宮而輪換九個球員。

半場落後兩粒反吸贏3:2

上半場形勢就好似兩隊喺英超走勢咁一面倒,熱刺贏晒上風,六分鐘就憑一次快速反擊開紀錄,孫興民左路傳畀後上入楔走個靚位嘅穆沙施素高,呢位法國國腳就諗都唔諗單刀射入。37分鐘輪到迪利阿里接應孫興民嘅傳波,禁區內勉強起腳,靠省到人改變方向令韋斯咸門將阿祖安卡斯迪路失守,運都贏埋嘅熱刺半場領先2:0。
槌仔幫易邊後嚟料,55分鐘阿休門前補中追近,五分鐘後再整球靚波,安祖卡路爾頭槌頂後,蘭仙尼突破越位左路傳中,阿休門前整多粒追平2:2。踢到70分鐘,韋斯咸嘅左路角球一斬,熱刺後衞艾達韋列特在禁區內走甩奧邦拿,後者頭柱一批死角入網就咁幫球隊反勝,雖然話只係晉級英聯盃八強,不過都算吐咗今季嘅烏氣。

搶盧保球衣 槌粉撻鑊甘

更加搞笑嘅係,韋斯咸贏波奇迹反勝之後,隊長麥克盧保將波衫掉向自家球迷觀眾席,大家梗係爭住搶,一位大漢直情飛身出嚟,諗住截一個就嚟到手嘅細路仔糊,點知衫就搶唔到,佢仲直接撻落地!更加蹺嘅係,日前水晶宮球員蘇亞尼又係用呢招拋波衫,點知可能因為水晶宮輸波啦,竟然俾球迷嫌棄佢件衫,一嘢掉番落場,場面非常尷尬。
熱刺輸波後仲禍不單行,普帥話上場大炒利物浦完場前換走嘅哈利卡尼,大腿有啲傷,唔知禮拜六作客曼聯趕唔趕得切復出,呢個消息對曼迷嚟講當然係喜訊啦!
同日英聯盃第四圈,車路士主場就2:1搞掂啱啱炒咗領隊朗奴高文嘅愛華頓,同樣打入八強。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載