› 選擇地區
三藩市
紐約
洛杉磯
其他美國地區
香港 台灣 北美
 
2017年11月01日

夏日求驗客:唔妥教練 心繫巴塞
尼馬後悔 入「門」

錢原來唔能夠令人特別快樂嘅!事緣有傳媒報道,尼馬今夏以破世界紀錄轉會費由巴塞隆拿轉投巴黎聖日耳門(PSG)三個月都唔夠,就已經覺得喺巴黎唔開心,好後悔離開巴塞咁話喎。

相關新聞:夏日求驗客:尼馬 C朗遭割喉?IS再發浴血海報針對世盃

有特權辣㷫PSG隊友

報道話尼馬掛住巴塞嘅生活,掛住兩位拍檔美斯同蘇亞雷斯,上星期六佢仲特登抽時間返舊東家探班,並將好兄弟重聚嘅相上載到個人ig,同PSG班隊友就冇咁親密囉!
其實都唔難理解,早前尼馬同卡雲尼爭射12碼搞到滿城風雨,最近又傳出佢喺隊內扮大牌,享有太多特權,包括有兩個物理治療師服侍、練波可以唔使參與防守、禁止對佢作粗野攔截,結果辣㷫咗班隊友;仲有嘅係,佢係唯一練波唔使帶印有PSG會徽裝備袋嘅球員,鍾意用自己牌子嘅袋或者任何贊助商嘅袋都得。
報道又話尼馬唔太滿意PSG教練艾馬利嘅訓練方法,覺得佢浪費太多時間用影片去研究比賽同分析對手,而前一星期對馬賽咁躁領紅牌,除咗踢到火起,尼馬亦被傳話想用呢種方法話畀艾馬利聽,自己唔妥佢某啲排陣。
到底篇報道講嘅有幾多真同假,大家請自行判斷,但艾馬利聽到呢啲咁擾亂軍心嘅傳聞就即刻走出嚟澄清:「尼馬係充滿決心同動力先會嚟到巴黎,佢有野心想同球隊一齊越攀越高。」對於傳尼馬唔鍾意訓練方式,艾馬利就話:「尼馬睇片時好專注喎,成日都坐第一排,而每個球員都知道呢個環節好重要,如果我唔播片,佢哋反而主動要求我播。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載