› 選擇地區
三藩市
紐約
洛杉磯
其他美國地區
香港 台灣 北美
 
2017年11月03日

夏日求驗客:熱刺K.O.皇馬
英超盛世返嚟喇

當歐聯分組賽開打前,雖然知道皇家馬德里身處嘅死亡H組,對手有多蒙特同熱刺唔易打,但個個都諗住呢支歐聯兩連霸嘅西甲勁旅,首名應該好穩陣,但點知踢完周三第四輪賽事後,呢組提前出線嘅,竟然係呢場喺溫布萊以3:1擊敗佢哋嘅熱刺,呢場會唔會係英超盛世重新開始嘅啟示?

阿里入兩粒 熱刺提早出線

皇馬兩周前已經喺巴拿比奴主場失威,喺先失波嘅劣勢下逼和熱刺1:1,周三踢次循環作客溫布萊,開賽27分鐘就失守,俾熱刺坐完波監嘅迪利阿里門前掃入。換邊後56分鐘,呢位熱刺中場再次得手,射門省中沙治奧拉莫斯改變方向入網,個人梅開二度;去到65分鐘,哈利卡尼助攻基斯甸艾歷臣半單刀射成3:0,大勢已去嘅皇馬,就只能靠剛奪世足先生、近況卻低沉嘅C朗喺80分鐘破蛋,但都挽回唔到面子,仲拱手先將出線資格讓咗畀熱刺。
雖然話另一場波因為更頹嘅多蒙特,主場只同尼科西亞踢成1:1,目前只得兩分,有七分喺手嘅皇馬要奪得另一出線席位仍然好樂觀,但今次輸1:3,令佢哋保持咗五年嘅歐聯分組賽30場不敗戰績告終,同時亦係九年來喺歐聯分組賽嘅最大敗仗,之前已經係2008年11月以0:2不敵祖雲達斯。

C朗反擊球迷唔認衰

連同上輪西甲爆冷不敵基羅納,皇馬已經兩連敗,受到外界口誅筆伐就理所當然。一向唔接受批評嘅C朗又發忟憎,除咗賴第一個失球助攻畀阿里嘅捷比亞越位,當俾人問到自己今季入球量係咁跌嘅時候,佢就反擊叫人去google打佢個名,就知道佢以前入過幾多波;至於隊長拉莫斯亦否認皇馬有信心危機,覺得因為佢哋係皇馬,啲人先愛將焦點放喺佢哋身上,但就有信心好快重拾霸氣。
至於熱刺梗係威威啦,將首次亮相溫布萊嘅皇馬打到潰不成軍,亦係隊史上首次贏對方。領隊普捷天奴賽後亦好自豪咁話,熱刺經過呢場波後已正式躋身歐洲強隊之列!而且,英超五路大軍𠵱家出線形勢都理想,或者直情提早過關,16強表現會係點?值得期待!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載