› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

鬥口響:期待華倫「衝冠」 - 聰鳴

睇咗咁多年嘅西甲,相信好多球迷都心諗「好悶,又係佢哋兩隊爭」,近呢10年可以打破西甲壟斷局面嘅就只有馬體會,今年終於都多隊華倫西亞(圖)!有人睇死華倫呢啲係虛火,但筆者就唔係咁諗,仲覺得佢哋有力同巴塞一鬥!
華倫上次攞西甲冠軍已經係14年前,當年陣容亦唔算星光熠熠,艾比達、巴拉查、安古路呢啲都係實而不華嘅球員,最有星味嘅已經係「小丑」艾馬。同當年差唔多,華倫𠵱家差唔多成隊都由棄將組成,干度比亞喺國米不受重用,施蒙尼沙薩之前喺韋斯咸更被恥笑係水貨。
不過唔緊要,教練馬些連奴功力深,成功將蔗渣變晒做燒鵝。最顯著係華倫嘅進攻銳利咗好多,上季總共只係入咗56球,但𠵱家聯賽打咗12場已經攻入32球。華倫咁攻得嘅原因,係因為馬些連奴大打簡單足球,同埋擅用棄將。
華倫今年棄用4-3-3改打4-4-2,隊長柏利祖嘅柏檔亦由安素佩雷斯改成干度比亞。唔係話安素佩雷斯唔好,佢上年場均都有3.2個攔截,但只可以話佢係一個好稱職嘅防中。反觀干度比亞大大隻隻瓣數多,雖然傳送準度麻麻,但勝在腳法好,hold波一流又有遠射腳頭,將啲波分畀干卡路古亞迪斯、安達斯彭利拿呢啲快馬就可以製造到攻勢。
至於施蒙尼沙薩更加唔使講,今季喺西甲已經入咗九球。之前華倫「衝冠」失敗,好多時都同財政問題有關,搞到成日要賣球員還債。但新加坡老闆入主咗之後就冇呢個問題,喺球員、教練眾志成城之下,話唔定再可以衝冠成功!
文:聰鳴

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載