› 選擇地區
三藩市
紐約
洛杉磯
其他美國地區
香港 台灣 北美
 
2017年11月24日

求驗客手記:鬥瑞士魚腩鯁親
曼聯出線hold住

周三歐聯分組賽,A組榜首曼聯作客巴素利只要拎一分就可以提早晉級,點知攻極唔入臨完場出事失守,輸0:1出線要hold住。領隊摩連奴賽後話唔怪輸波罪人戴利白蘭特,有鑊就一齊孭,不過外界就怪佢太早換走中場保羅普巴。姑勿論點都好,紅魔𠵱家12分在手,下輪分組賽煞科戰只要唔輸得大大鑊,入16強仲好穩陣嘅。

白蘭特失位成罪人

普巴喺上場英超4:1反勝紐卡素場波傷癒復出,到周三作客巴素利繼續正選披甲,表現仲相當唔錯,幫曼聯喺上半場控制大局,可惜機會唔少但把握力麻麻,只係得盧卡古同安東尼馬迪爾各一次攻門可以命中目標,半場互無紀錄。踢到66分鐘,摩佬將普巴調走,換入尼曼查馬迪;八分鐘後再換入同普巴一樣喺上場英超傷癒復出嘅前鋒伊巴謙莫域,但形勢仍然冇乜太大改善。
巴素利下半場搶番唔少攻勢,到89分鐘,20歲德國小將比迪達喺禁區妙傳劏開曼聯成條防線,由伏兵遠柱嘅蘭治搶點成功,力壓紅魔守將戴利白蘭特窄位射入,令曼聯作客0:1敗走,今季歐聯首次落敗。

下輪輸七球先出局

曼聯輸波之後,仲未確定可以出線,佢哋喺兩星期後A組煞科戰會喺主場迎戰莫斯科中央陸軍,如果又輸,加上同組巴素利作客擊敗賓菲加嘅話,就會出現三隊同得12分嘅情況,到時就要計吓數,三隊各自對賽嘅成績同埋得失球,呢個情況以曼聯最有利,目前三隊對賽嘅得失球係曼聯+5、巴素利-1、中央陸軍就-4。即係話就算曼聯喺煞科戰輸畀中央陸軍四球或以下,依然可以首名出線;淨輸五至六球,仲保得住次名出線;要喺奧脫福被血洗淨輸七球,先至會出局,應該唔會有咁嘅場面啩。
對於今場敗仗,摩佬賽後就話唔怪白蘭特:「上半場我哋表現好完美,但就係欠咗入球。我哋一早知巴素利喺易邊後會反擊,所以計劃喺上半場入波,偏偏把握唔到,到下半場要再有入球機會就好難。對於完場前嘅失波,我知道戴利白蘭特怪罪自己,但咁係唔公平,因為我哋係一個團隊,上半場本應可以贏五、六球,所以今場賽果肯定唔單係白蘭特嘅錯。」
另一支英超球隊車路士,喺C組輕鬆作客4:0贏卡拉巴克,提早一輪出線。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載