蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年11月29日
馬上成為壹會員

男拔鬥西島力爭衞冕

《體蘋果》facebook今午3時30分會直播男拔對西島,由本報客席名家丘建威旁述賽事,同觀眾見證王者誕生。

【體壇拾趣】今日下晝三點半喺蒲崗村道人造草足球場上演嘅學界港九區D1足球A Grade決賽,衞冕嘅拔萃男書院雖然傷兵問題嚴重,後防兵源緊絀,惟眾將仍自信可以喺呢場「翻版決賽」擊敗西島中學,打破隔年奪冠嘅魔咒。
喺分組賽得四勝一和嘅男拔,四強大勝聖若瑟書院4:0殺入決賽,將會同另一場四強以2:1小勝皇佐治五世學校嘅西島中學爭冠,惟中堅葉卓文喺四強尾段領黃今仗需停賽,而男拔頭號射手孫銘謙同隊長鄭進泓亦先後受傷,令球隊嘅兵源緊絀。不過,男拔主帥馮凱文賽前話,兩位主力大有機會喺決賽復出,而球隊喺決賽會以穩守突擊為主:「對手有身高優勢,加上對抗性好,我哋會加強前場逼搶,務求減低佢哋嘅高空優勢。」
喺去年決賽兩度射破西島大門嘅孫銘謙,就希望能夠喺學界生涯最後一仗取勝;雖然國際學校嘅球員身形佔優,但呢位效力港甲凱景嘅射手卻毫無懼意:「甲組嘅對抗性更強,久而久之就會有經驗,知道點去應付身形較高大嘅球員。」男拔雖然連續六年殺入決賽,卻只能喺雙數年奪冠,鄭進泓揚言要打破隔年奪冠嘅魔咒,領軍擊敗西島,為即將畢業嘅中六隊友贏得冠軍。至於頭場喺下午2時15分舉行嘅季軍戰,由聖若瑟書院對英皇佐治五世學校。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載