› 選擇地區
三藩市
紐約
洛杉磯
其他美國地區
香港 台灣 北美
 
2017年11月30日

鬥口響:A米沉淪真陰公 - 飛鴻

錢解決到嘅問題,係咪就唔係問題?睇吓AC米蘭就知道,答案一定係失敗啦。米蘭作為傳統豪強,就算近年家道中落,明明需要一啲有藍圖、有重建經驗嘅教練幫吓手重組,用一班好青訓加幾粒星,磨合吓團結啲踢番隊型同鬥志出嚟先,但就死都堅持要用昔日名將做教練,唔通中資財團真係以為一句「We are so rich」就可以解決所有問題?
望一望意甲聯賽榜,榜首拿玻里、國際米蘭、祖雲達斯同羅馬市雙雄,都唔係用緊自己球隊出身嘅名將教,而且拿玻里教練沙尼就更加係書院派嘅代表人物,佢直情冇做過球員,90年代一路返銀行工一路上堂學做教練,然後靠教業餘波累積經驗,一步一步咁打到今日嘅地位,而佢嘅戰術理念同執行力,都屢次俾哥迪奧拿大讚同佩服。至於史巴列堤同艾基利都唔係出色嘅球員,但就喺教練界由意丙教到上意甲,成績夠掂先有人挖角。
但係偏偏AC米蘭就唔化,艾基利教嗰陣就算贏完聯賽冠軍都俾人詐型,然後一失歐聯席位就炒魷,結果到𠵱家沉淪中游,吓吓都想一步登天返去以前輝煌時光,期望同實力完全唔成正比下,仲搞到恩沙基、施多夫等一個個名宿聲名被毀真陰公。
今季中資財團土豪上身,一次過買十幾個人返嚟,但以蒙迪拿(圖)嘅教波經驗點應付到,喺出晒班新嚟嘅大哥情況下,最後成績仲差過上季用文路爾盧卡迪利呢班細路嘅日子,有幾rich都係一塌糊塗。
文:飛鴻

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載