› 選擇地區
三藩市
紐約
洛杉磯
其他美國地區
香港 台灣 北美
 
2017年11月30日

鬥口響:名宿救亡成定律 - 尊嘉

AC米蘭喺周一炒咗蒙迪拿後,搵咗前球會名將加度素(圖)接手,佢嘅執教成績雖然就麻麻地,但勝在熟悉球會運作即插即用,對目前需要穩定嘅米蘭嚟講,絕對係一個好選擇。
作為歐洲著名大球會,要搵一個明白球會歷史、方向理念嘅教練並唔容易,再要將呢啲傳統灌輸落球員度,讓佢哋踢出風格取悅球迷同爭取佳續,就難上加難。唔信你睇吓強如摩連奴當初接手皇馬、曼聯,都係需要一季嘅適應期,先有力帶領球隊衝冠。
反觀你睇吓當初接手肥賓執教皇馬嘅施丹,半季僅輸兩場仲攞埋歐聯冠軍,同肥賓嗰隊波差異甚大,呢個就係球會名將嘅威力所在。
當然唔係個個都會好似施丹咁成功,但點解米蘭試過恩沙基、米赫洛域之後,依然要選擇「紅褲子」加度素,原因係球會需要穩定。過去夏天米蘭大事收購,球員嚟自五湖四海,新任隊長邦路斯曾經效力過死敵國米同埋競爭對手祖記多年,曾有傳佢喺更衣室難以服眾,故米蘭需要作風強硬嘅加度素嚟到,重振士氣。
而作為球會名將,可以更有「牙力」要求更長時間去執靚隊波,球迷同傳媒嘅批評,始終會較批評「外人」輕手,正如當年杜格利殊接掌紅軍後,當初鬧到鶴臣狗血淋頭嘅傳媒,作出批評前都會忌佢三分。更重要嘅係,𠵱家季中有邊個會肯接手爛攤子?你睇愛華頓搵咗領隊咁耐都未搵到就知,故每當球會需要救亡嘅時候,搵名將接手平穩過度,似乎係最合適嘅選擇。
文:尊嘉

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載