› 選擇地區
三藩市
紐約
洛杉磯
其他美國地區
香港 台灣 北美
 
2017年12月05日

夏日求驗客:又施絕殺神技破「槌」
曼城13連勝 等驅魔 - 求驗客

順到停唔到嘅曼城,禮拜日英超末段又建功,主場2:1反勝韋斯咸,連贏13場聯賽追平英超單季連勝紀錄。「藍月」近三場都係靠完場前入波小勝對手,盡顯冠軍球隊應有嘅鬥志同實力;曼城要超越13不祥,就要喺嚟緊嘅禮拜日,曼市打吡作客曼聯贏波!

連續三場英超絕殺

曼城喺呢場牌面上強弱懸殊嘅英超,上半場未算完全控制大局下,尾段仲被「槌仔」中堅奧邦拿接應角球頂入,不過下半場換入加比爾捷西斯改打4-4-2後形勢大變,57分鐘先有「耶穌仔」傳中俾奧達文迪撞入追平,踢到83分鐘靠奇雲迪布尼交出一個靚到絕嘅過頭波,大衛施華突破越位近門鏟射撞入,連續三場英超喺80分鐘後射入奠勝球,而且同樣都係贏2:1。
幾次喺失分邊緣下大步檻過,曼城俾英媒話變咗以前嘅曼聯咁有「費格遜時間」,領隊哥迪奧拿話呢個對佢哋嚟講係讚美︰「我寧願唔係踢到最後時刻先贏,不過英超就係英超。我聽聞過『費格遜時間』,當時我雖然未嚟,不過冠軍球隊需要有呢樣嘢。最近幾場比賽我哋展示到永不放棄嘅態度,對手唔係想比賽,淨係想防守,呢方面我可以理解。」
呢三分除咗幫曼城繼續喺榜首有八分優勢,而且佢哋近13輪全勝,已經追平由上季車路士、2001/02球季嘅阿仙奴共同保持嘅英超單季最長連勝紀錄。

哥帥寸爆:想普巴踢囉

不過西人講13不祥,咁啱呢兩隊波都喺第14場斷纜,而曼城禮拜日就會作客大戰曼聯,如果贏波除咗破紀錄外,榜首優勢仲會擴大到11分。
紅魔中場保羅普巴之前就心地好差咁話,希望曼城有重要球員受傷踢唔到呢場,結果變咗佢自己上場拎紅牌要停賽,藍月領隊哥迪奧拿就以德報怨,反而話希望普巴可以落場:「佢真係咁講?我希望冇球員受傷。我會希望普巴可以落場同我哋對壘,因為我鍾意對派出最強陣容嘅球隊,睇吓我哋踢唔踢得贏。不過我諗佢唔係真係希望有其他球員受傷嘅。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載