› 選擇地區
三藩市
紐約
洛杉磯
其他美國地區
香港 台灣 北美
 
2017年12月07日

鬥口響:高端金球獎 - 飛鴻

自古以來,金球獎都係球壇「高端獎項」,直頭係球員嘅最高榮耀。金球獎係由一班雖然冇份踢,但其實跟得最貼所有賽事、人物嘅記者嚟票選,中間冇存在咩避嫌、瓜葛咁,而且呢個獎真係只此一家,冇巧立名目去取悅觀眾,我就撐佢繼續keep住一年一大獎夠晒皮!
喺普遍貪心嘅人類世界,物以罕為貴係永恒真理,所以就算國際足協1991年起已經搞世界足球先生選舉,都搶唔到金球獎風頭。唔係話世界足球先生獎「低端」,仲不知幾大規模㖭,排場又勁,出席嘅球星名人又多,不過畀人感覺就變咗一場騷咁,咩嘢最佳11人呢啲獎,其實頒畀邊個點都有得拗,而且呢個獎咁多年嚟嘅地位,都超越唔到從來唔整色整水,堅守傳統喺法國頒嘅金球獎。
有一點係好緊要,金球獎以記者投票嚟計數,冇錯,講踢波佢哋梗係唔會好過班球員,但其實投票呢班記者先至係最緊貼所有足球消息、甚至係每場波嘅人。日日都要留意各大聯賽消息,你估如果要傾英超,會係班記者熟啲,定係德國教練路維熟啲?
好似2013年拜仁攞三冠王嗰年咁,當年列貝利(右)贏盡民間掌聲,嗰年呢位法國球星基本上贏盡歐洲各大獎項,包括歐洲最佳球員,但咁啱金球獎同世足先生合併咗,記者嘅聲音只係佔三分一,最終列貝利喺呢個範疇贏晒,但最後喺球迷票選同埋國家隊教練、隊長投票呢兩瓣俾C朗、美斯反吸,而呢一年都可以話係呢兩位大哥最俾人覺得靠知名度「大石擲死蟹」嘅時刻。
公信力呢家嘢,唔係靠威逼利誘就可以得到,正如對國家有冇歸屬感一樣,公道自在人心。
雖然時代一路前進,但舊嘅嘢冇話一定fail,金球獎喺1956年已經只此一家,到今年第61屆,的確係唔變好過變!
文:飛鴻

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載