蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月10日
馬上成為壹會員

求驗客手記:國足出六小將都頂住
納比醫好恐韓症

為國足先拔頭籌嘅韋世豪(箭嘴示)與隊友慶祝入球。路透社

上周六東亞錦標賽決賽周男足賽事開打,打頭陣由中國對南韓。國足教頭納比放眼未來,派出六個U23球員擔任正選,成場波就好似玩過山車咁,早早憑首次代表國家隊上陣嘅韋世豪入波領先,但轉個頭就俾南韓連入兩粒,半場落後。好彩下半場尾段于大寶入番球,中國先可以2:2逼和南韓。上次喺三月嘅世界盃外圍賽,中國隊罕有咁贏南韓,今次用後生仔為主又打和南韓,唔通「恐韓症」已經好番?賽後領隊納比大讚六個新仔,仲話要畀佢哋打多啲咁話。
今場納比派出六個U23成員,其中劉奕鳴、何超、楊立瑜同埋韋世豪都係第一次為國家隊上陣,本來以為練兵為主,點知打落醒神。開賽九分鐘,中國隊喺右路傳中,韋世豪射右下角網仔,為國足先開紀錄。不過四分鐘之後,南韓就追平比分,李在城右路突破入禁區,吸引包括門將顏駿凌在內嘅國足球員包夾,佢傳畀無人看管嘅金信煜輕鬆射入。

「喺中國22歲叫後生」

19分鐘,南韓大腳傳前到禁區,金信煜今次投桃報李,頂畀李在城拗腰破網,反超前2:1。場波要到77分鐘先再有入波,國足左路傳中,于大寶頭槌中門楣底彈入,最終逼和南韓。
賽後網民就讚納比敢用新人,而納比就大讚六個新仔,仲話要畀佢哋打多啲比賽:「六個球員嘅表現可圈可點,我對佢哋嘅未來充滿信心。我覺得我哋要畀多啲時間同耐心佢哋。可能喺中國,大家覺得22歲嘅球員好後生,但我就認為唔夠18歲先叫後生。佢哋應該要踢多啲呢種比賽鍛煉自己,咁大賽先可以擔到大旗。」呢六位新仔喺出年一月就會參加U22亞洲盃,三月由中國舉辦嘅中國盃亦都可能再次見到佢哋。
之後到東道主日本登場,主場迎戰北韓嘅比賽,靠門將中村航輔屢救險球,力保不失踢到補時五分鐘由中場井手口陽介建功絕殺,險勝1:0。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載