› 選擇地區
三藩市
紐約
洛杉磯
其他美國地區
香港 台灣 北美
 
2017年12月14日

鬥口響:歐聯新貴磨定刀 - 尊嘉

歐聯16強抽籤周一揭盅,當中不乏球壇新貴挑戰傳統豪門的戲碼,觀乎今季「皇巴拜祖」嘅統治力均有所下降,相信各英超球隊或巴黎聖日耳門(PSG),將有力打破近年「皇巴拜祖」壟斷歐聯的格局、改朝換代。
先講財大氣粗、銳意喺歐聯有一番作為嘅法甲新貴PSG,今個夏天以破轉會費紀錄收購前巴塞隆拿球星尼馬(圖),除大幅加強戰力外,更重要係向外界說明,佢哋要打破傳統豪門壟斷歐聯嘅決心!上屆喺歐聯淘汰賽曾大炒巴塞四粒,賽果已經驚為天人,只可惜最終未竟全功,風頭被巴塞嘅奇蹟反勝蓋過,但足見所謂豪門並非牢不可破!吸收咗上屆嘅教訓,今季PSG更以破歐聯分組賽嘅入球紀錄,力壓拜仁首名出線;抽籤後遇上有C朗入球效率下降嘅皇家馬德里,尼馬同PSG勢必把握機會推翻「皇」朝。
而今季哥迪奧拿進一步改造下嘅曼城,不但喺英超所向披靡、多次末段絕殺,歐聯16強亦抽靚籤只係對巴素利,實力運氣兼備下有力再闖四強。而其他英超球隊聯賽提早投降下將全力出擊歐聯,觀乎熱刺、利物浦、車路士各支球隊,均有一劍封喉能力嘅球星如哈利卡尼、穆罕默德沙拿及夏薩特等,強強對碰未必輸蝕。
加上「皇巴拜祖」未如以往般霸氣,其中皇馬、拜仁、祖記均次名出線,前兩者曾敗予熱刺、PSG腳下;巴塞亦曾遭奧林比亞高斯守和,自尼馬離隊後「美斯依賴症」更加明顯,16強面對「美斯剋星」嘅車仔,分分鐘陰溝裏翻船!故球迷今季將極有可能看到,歐聯新貴擊殺傳統豪門嘅情景。
文:尊嘉

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載