› 選擇地區
三藩市
紐約
洛杉磯
其他美國地區
香港 台灣 北美
 
2017年12月14日

求驗客手記:送走瘟神止八場不勝
蜜蜂新帥honeymoon

柏柏斯達夫普路斯(左)同香川真司(中)各入一球,贈緬恩斯兩蛋。

多蒙特終於識贏波喇!經歷八場聯賽不勝,送走埋瘟神教頭保斯後,周二開快車就喺新教練史托加領軍下,作客2:0擊敗緬恩斯,都算係一吐烏氣,亦暫時潑熄班蜜蜂球迷嘅怒火,等管理層冇咁受壓,證明呢位科隆前主帥暫時對辦。
講真,蜜蜂兵團呢場波都唔係贏得好輕鬆,對手喺上半場早段有球中楣波唔入,逃過大難後都要去到下半場55分鐘,先由柏柏斯達夫普路斯喺一次罰球攻勢中窩利抽入打破缺口,然後去到完場前一分鐘先鬆一口氣,靠香川真司奠定2:0勝局,八場聯賽不勝嘅頹勢先可以告一段落,亦證明新帥史托加好腳頭,首次帶隊就可以攞足三分。

史托加有「緬」贏兩粒

史托加上任前,真係好多球迷覺得多蒙特班高層係咪儍咗,搵個啱啱俾榜尾球隊科隆炒魷嘅主帥嚟教,驚佢仲衰過保斯。不過,𠵱家諗深一層,科隆前幾季成績其實唔錯,上季仲衝上第五取得歐霸盃資格,呢位教練未必咁弱,仲有功㖭,而今季係因為科隆賣走莫迪斯迪呢位射手,同埋包括祖拿斯赫特在內等傷兵一籮籮,先搞到如斯田地。
上任後只得48小時預備呢場波嘅史托加,賽後就話球員已經等待呢場勝仗好耐,對建立番信心好重要,因為球隊已經成個半月冇贏過波。另外,佢亦好謙虛咁冇批評前主帥保斯,話其實對方開季教得唔錯,有時真係講運氣,好似自己今季教科隆一樣。
考牌戰過關,但史托加隊多蒙特好快就迎來另一場硬仗,就係禮拜六要喺主場惡鬥近期亦因戰績麻麻要搶分嘅賀芬咸,對方少帥尼高斯曼仲係今場座上客嚟視察軍情,就睇吓蜜蜂兵團可唔可以藉呢場反底波再接再厲,縮窄同榜首拜仁慕尼黑以及其他前列球隊嘅差距。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載