蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月11日
馬上成為壹會員

鬥口響:怕沙拿學足 - 尊嘉

今周主題:點睇古天奴出走?

古天奴轉投巴塞隆拿已成定局,定必傷透一眾利迷嘅心,甚至擔心紅軍會步入失去蘇亞雷斯後,不斷重建嘅輪迴。不過手握1.4億鎊嘅紅軍,喺高路普嘅帶領下已非「吳下阿蒙」,睇番今季紅軍係古天奴缺陣嘅比賽,勝率竟然比佢在陣時高出20%。
數據係唔會呃人嘅,睇番今季紅軍22場嘅英超成績,有古天奴在陣時只取得六勝六和一負約46%嘅勝率,反觀無古天奴在陣嘅九場比賽,竟取得六勝二和一負勝率達66%嘅佳績。
當「古埃及文明」都能健康出征時,高路普鍾意喺前線排出沙迪奧文尼、羅拔圖法明奴同穆罕默德沙拿(左),將古天奴移後校炮,無錯攻力係銳利,但中場得番軒達臣搭韋拿杜姆或安利簡恩,正所謂「失中場失天下」,好似歐聯俾西維爾奇蹟追和3:3,同上月聯賽逼和阿仙奴3:3嘅賽事,正正喺排出上述陣容,紅軍攻守似乎唔多平衡。
𠵱家古天奴走人,可以用錢換嚟華基爾雲迪積克穩固後防,中場拿比基達又即將加盟,紅軍實力短時間唔會大幅下降。反而筆者最擔心嘅係古天奴會做壞規矩,若下季皇馬向沙拿招手,最怕沙拿又會有樣學樣,假若高氏紅軍最終星散墜落,實屬始於古天奴之亂呢!
文:尊嘉

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載