› 選擇地區
三藩市
紐約
洛杉磯
其他美國地區
香港 台灣 北美
 
2018年01月31日

求驗客手記:美職班主夢成真
碧咸招兵 保特報名

萬人迷做班主喇!籌組足足四年,碧咸位於美國邁阿密嘅球隊終於喺美國時間周一,獲批准加入美職聯賽,成為該聯賽第25支球隊。碧咸形容自己夢想成真,又多謝邁阿密市民支持佢追夢,「人哋話呢個城市建基於夢想,今日你哋終於令我夢想成真!」
美職聯專員加柏(Don Garber)聯同碧咸周一現身發佈會,宣佈呢支以邁阿密為根據地嘅球隊,終於獲批准加入美職聯,將會同紐約城、FC多倫多等球隊角逐冠軍殊榮。呢支球隊目前仲喺起步階段,仲未公佈隊名、隊徽同埋採用嘅主色,但據講碧咸已經物色教練、球員、職員等等,但就未有咩聲氣。

「邁阿密FC」後年成軍

根據美國《ESPN》報道,球隊會喺2020年正式加入美職聯,更有傳碧咸會向皇馬球星基斯坦奴朗拿度(C朗)招手。被問到會引入啲咩球員,碧咸就話想建構另一隊曼聯,培養明日之星:「我已經諗到好多一流球員,邁阿密要球星,而我哋都計劃咁做。至於C朗……你最好問吓佢本人,但我嘅夢想就係建設一個最先進嘅青訓系統,將有才華嘅年輕小將一網打盡。」
其實碧咸並非單一投資者,佢同多名商人組成咗財團,仲成功喺邁阿密搵到地起球場同訓練設施。唔單止付出汗水,碧咸足足使咗1,800萬鎊(約1.9億港元)先攞到美職聯嘅專營權,但以咸爺嘅財力嚟講根本係九牛一毛。
碧咸做老闆咁大件事,好多名人都有出嚟恭喜佢,巴西球星尼馬、牙買加飛人保特、歌手Jennifer Lopez等都有拍片祝賀。而一向鍾意踢波嘅保特仲乘機向咸爺自薦:「如果係要前鋒,我就係適合嘅人選。你要入波,我都可以畀到你!」橫掂碧咸隊波等人用,保特真係可以考慮吓去見工!

保特為試腳苦練認冇態

而為咗轉型成為足球員,保特禮拜一就現身南非出席超聯球隊Mamelodi Sundowns嘅操練,佢喺練習之後重申自己係認真想投身足球,但承認以目前嘅狀態,難以喺今年三月到德甲多蒙特嘅試腳當中有所作為。保特話:「我想催谷吓狀態。但今日嘅練習話畀我知,我嘅狀態真係好差。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載